Internet arqyly esirtki satqan pavlodarlyq 10 jylǵa sottaldy

NUR-SULTAN. QazAqparat – Pavlodar turǵyny ınternet arqyly asa iri kólemde esirtki taratqany úshin 10 jylǵa sottaldy. Bul týraly ІІM baspasóz qyzmeti málim etti, dep habarlaıdy QazAqparat.

Kúdiktini esirtki qylmysyna qarsy is-qımyl bólimsheleriniń qyzmetkerleri ustap, oǵan QR QK 297-babynyń 3-bóligi boıynsha aıyp taǵyldy.

«Sot úkimimen 25 jastaǵy pavlodarlyq ınternet resýrstary arqyly asa iri kólemde esirtki taratqany úshin 10 jylǵa bas bostandyǵynan aıyryldy. Qala turǵynynan satýǵa arnalǵan 78 gramnan astam tyıym salynǵan zattar tárkilendi. Esirtki polıetılen paketterge salynyp, oqshaýlaǵysh lentamen oralǵan. Sottalýshy sıntetıkalyq esirtkilerdi saqtap, sodan keıin olardy jasyryn oryndarǵa ornalastyrǵan. Óziniń «jumys berýshisin» olardyń ornalasqan jeri jáne salynǵan esirtkiniń mólsheri týraly fotoǵa túsirý arqyly habardar etken», - delingen resmı habarlamada.