Internet alaıaqtyq: Elordada 97 adam jaýapqa tartyldy
NUR-SULTAN. QazAqparat – 2020 jyly elordalyq polıtseıler ınternet-alaıaqtyq úshin 97 adamdy qylmystyq jaýapkershilikke tartyp, jábirlenýshilerge 100 mıllıon teńgelerin qaıtaryp berdi, dep habarlaıdy QazAqparat tilshisi.
Elorda polıtsııasynyń basshysy Erjan Sadenovtyń aıtýynsha, onlaın-saýdanyń pandemııa kezinde artqany baıqaldy. ıAǵnı alaıaqtar ınternet jelisinde osy sátti paıdalanǵan. Olardyń arasynda medıtsınalyq betperdeler, antıseptıkter, dári-dármekter, tondar, uıaly telefondar, jıhazdar jáne basqa da zattar satylady degen syltaýmen jasalǵan alaıaqtyqty ataýǵa bolady. Alaıaqtar olardyń bárin júzdegen jalǵan akkaýntpen áleýmettik jelilerdegi habarlandyrýlar arqyly satqan. Mundaı ınternet-resýrstar keıinnen anyqtalyp, buǵattaldy.
Alaıaqtartyń kelesi toby ózderin bank qyzmetkeri retinde tanystyryp, bank kartalary bar adamdardan aldaý arqyly rekvızıtterin jáne sms-parolderin bilip, osylaısha olardyń shottarynan aqsha jymqyrǵan. Osyndaı áreketterden 300-den astam elordalyq zardap shekti.
«Ótken jyldyń ekinshi jartysynda «OLX» jáne «Kolesa» jeke habarlandyrý saıttarynyń qoldanýshylary zardap shekti. Osy saıttarda taýar satamyn degen azamattarǵa alaıaqtar jetkizý qyzmetin usynǵan. Eshteńeden kúdiktenbegen azamattarǵa saıtqa uqsas siltemeni jiberip, bank kartasynyń rekvızıtteri bar anketany toltyrýdy ótingen. Alaıda, toltyrǵannan keıin qoldanýshylar paıda túgil, jınaǵan qarajatynan da aıyrylǵan. Alaıaqtar kóbinese azamattardyń beıqamdyǵyn, sengishtigin jáne muqııatsyzdyǵyn paıdalanady. Olar shottan aqshalary alynǵan kezde ǵana baryp aldanǵanyn biledi», - dedi departamentten.
Osyǵan oraı alaıaqtyq áreketterdiń aldyn alý úshin Nur-Sultan qalalyq polıtsııa departamenti:
- úshinshi tulǵalarǵa bank kartalarynyń rekvızıtterin, CVV-kodty jáne paroldi bermeýdi;
- taýardyń bar-joǵyna jáne sapasyna kóz jetkizbeıinshe aldyn ala tólem jasaýdan bas tartýdy;
- onlaın-nesıelerdi resimdeýdi aldyn alý úshin bóten adamdarǵa derbes derekterdi bermeýdi;
- aqshany kóbeıtý boıynsha kúmándi aktsııalarǵa qatyspaýdy;
- qyzmetterdiń shynaıylyǵyn tekserýdi (OLX-jetkizý, múlikti jalǵa alý, utystarǵa aqsha salý) usynady.
