Internet alaıaqtyqtyń jańa túri – kólik urlaý
ASTANA. KAZINFORM – Internet alaıaqtyqtyń jańa túri – kólik urlaý. Biraq, osy kúnge deıin urlanǵan kólikterdiń bireýi de tabylmaǵan. Bul týraly «JibekJoly» arnasyndaǵy «BúginLive» baǵdarlamasynda sala mamandary aıtty.
Internet alaıaqtyqtyń jańa túri órship tur. Bul – logıstıkalyq kompanııalar men kólik ıeleri arasyna jasyryn deldaldyq ornatyp, jańadan alynǵan avtolardy urlaý alaıaqtyǵy!
Redaktsııamyzǵa «kóligimdi urlap ketti, logıstıkalyq kompanııa atyn jamylyp, jalǵan qujattar kórsetti» dep shaǵymdanǵan, jańa ınternet alaıaqtyq túri týraly aıtqan jábirlenýshiler bar.
Jábirlenýshi Juban Qasymov Almaty qalasynyń turǵyny. Logıstıkalyq kompanııaǵa senip, sońǵy úlgidegi Toyota 75 kóligin tizgindeý úshin qaltasyndaǵy sońǵy aqshasyn deldeldyń qolyna ustatqan. Biraq, saıyp kelgende jumsalǵan qarajat ta, elge ákelingen kólik te joq, san soǵyp qalypty. Sodan beri 8 aı ótken. Kirmegen kabıneti men qaqpaǵan esigi qalmaǵan.
– Bul – osy jyldyń qańtar aıynda bolǵan oqıǵa. Ózimiz artynan zerttep kórdik. Bizdiń kólik 17-shi qańtar kúni aqtaýǵa jetkizilipti. Alaıaqtar reseılik tirkeý nómirlerin taǵyp, Oral jaqqa qaraı alyp ketken. Ol azamattar ózderin logıstıkalyq kompanııa ókilderimiz dep tanystyrǵan bolatyn. Aryz jazdyq. Biraq, áli sot bolǵan joq,-deıdi jábirlenýshi.
Al, quqyq qorǵaý salasynyń ókilderi mundaı faktilerdiń beleń alyp bara jatqanyn jasyrmady.
– Ókinishke oraı mundaı jaǵdaılar jıi kezdesip jatyr. Bul birinshiden urlyq emes, alaıaqtyq faktisimen saralanady. Bundaı derekter boıynsha byltyrǵy jyly, bıylǵy jyly polıtsııa qyzmetkerlerimen úsh top quryqtaldy. Birinshi top boıynsha 14 adam, ekinshi top boıynsha 7 adam, úshinshi topta 3 adam qamalyp, jaýapkershilikke tartylýda. Biraq, keıbir jaǵdaıda kólikter tabylmaı jatyr. Jábirlenýshiler bir kún, eki kún ótkizbeı bizge habarlassa tabý múmkindigi kóp bolatyn edi, - dedi QR ІІM Krımınaldyq polıtsııa departamentiniń asa mańyzdy ister jónindegi aǵa jedel ýákili Nurbol Jeksenbek baǵdarlama barysynda.
Iá, shaǵymdanýshylardyń salǵyrttyǵynan joǵalǵan temir tulparlardy tabý qıyn. Der kezinde áreket etpegendikten kólikterdi alaıaq deldaldar shekara asyryp jiberedi. Mamandardyń sózinshe alaıaqtyqtyń basym bóligi azamattar kólikke onlaın tapsyrys bergen jaǵdaı oryn alady.
Qazir elde «Della», «FaFa» degen platformalar bar. Turǵyndar sol arqyly kórshi elderdegi arzan kólikterge tapsyrys beredi. Al, bul platformalardy «jalǵan deldaldar» torýyldap otyrady. Júıe bylaı jumys isteıdi:
- Azamattar ótinimderin tirkeıdi;
- Logıstıkalyq kompanııanyń ókilderi tapsyrysty qabyldaıdy;
- Alaıaqtar satylatyn kólik bar dep, dıllerdi aldaıdy;
- Sońynda satyp alýshy da, logıstıkalyq kompanııa da san soǵyp qalady.
Jyl basynan beri kólik alaıaqtyǵymen aınalysqan 32 derek tirkelgen. Sonyń basym bóligi eldegi iri megapolısterde. Kólik tasymalymen aınalysatyn kompanııa ókilderi mundaı jaǵdaıda logıstıkalyq uıymnyń qujattarymen jaqsylap tanysyp alý kerek,-deıdi. Mekeme jumysynyń shynaılyǵyna kóz jetkizgennen keıin ǵana shart jasasý kerek.
– Negizinde kólik bolsyn, basqa da júk bolsyn tasymaldar aldynda adam balasy sál saýatty bolýy kerek. Bizde tájirıbede bul kúndelikti kezdesedi. Klıentterdiń kóbisi aqsha únemdeý barysynda osy saıttarǵa salady. Neǵurlym logıstıkalyq kompanııadan 20-30 myń teńge artyq tapqannan góri, 50-60 myń teńge únemdep qalaıyn degen maqsatta kóbisi saıtqa salady. Biraq, saıttyń qaýipsiz ekenin elemeıdi. Al, alaıaqtar osynyń barlyǵyn paıdalanady, - deıdi kólik tasymalymen aınalysatyn kompanııa ókili Gúlnar Qarshyǵına.
Aıta keteıik, kólik urlyǵy, ásirese, iri megapolısterde – Almaty men Astana qalalarynda kóp tirkeledi. Bas prokýratýra jarııalaǵan derekter boıynsha, Qazaqstanda aı saıyn ortasha 62 kólik urlanady, sonyń ishinde 150-ge jýyq urlyq maqsatsyz júzege asyrylǵan eken.
Buǵan deıin qaraǵandylyq polıtseıler kólik urlyǵymen aınalysqandardyń izin sýytpaı ustap, jaýapkershilikke tartqany týraly jazǵan bolatynbyz.