Internet-alaıaqtyqtardy tergeý boıynsha «Kıberpol» mamandandyrylǵan toptary quryldy

ASTANA. KAZINFORM – Endi barlyq óńirlerde alaıaqtyqtardy tergeý boıynsha «Kıberpol» mamandandyrylǵan toptary jumys isteıtin boldy. 

Alaıaqtardy ustaý úshin memlekettik organdar, qarjy mekemeleri jáne jeke sektormen ózara is-qımyldy kúsheıtýge basa nazar aýdarylyp otyr. Mundaı qylmystardy anyqtaýǵa jáne ashýǵa, sondaı-aq uıymdastyrýshylar men qatysýshylardy ustaýǵa baǵyttalǵan sharalar kesheni iske asyrylýda. QR ІІM Krımınaldyq polıtsııa departamenti Kıberqylmysqa qarsy kúres ortalyǵynyń bastyǵy Jandos Súıinbaı OKQ alańynda osylaı dedi. 

«Jedel-izdestirý is-sharalarynyń keshenin iske asyrý barysynda 2023- jyldyń sońynda tek Astana qalasynda 4 alaıaqtyq Call-ortalyq anyqtalyp, joıyldy. Olardyń qyzmetkerleri tek jaqyn jáne alys shet elderdiń baılanys operatorlarynyń nómirlerine qońyraý shalǵany anyqtaldy. Іzdeý is-sharalary barysynda garnıtýrasy bar 170-ten astam noýtbýk, arnaıy baǵdarlamalarmen qorǵalǵan jelilik jabdyq tárkilendi», - dep habarlady spıker.

Eske sala keteıik, qazaqstandyqtardyń qaı eldiń alaıaqtaryna jıi aldanatyny týraly jazǵan bolatynbyz. Sondaı-aq, jyl basynan beri 3 myń qazaqstandyq ınternet alaıaqtarǵa 4 mlrd teńge berip, san soǵyp qalǵan.