Internet alaıaqtary aqmolalyqtyń depozıttegi 5,5 mln teńgesin sheship aldy
KÓKShETAÝ. KAZINFORM - Internet alaıaqtary 69 jastaǵy aqmolalyq zeınetkerdiń depozıt shotyndaǵy 5,5 mln teńgeni sheship alǵan. Alaıaqtar qylmystyq árketin júzege asyrý úshin zeınetkerge úsh ret qana telefon shalǵan.
Aqmola oblystyq PD baspasóz qyzmetiniń málimetinshe, jábirlenýshige alaıaqtar alǵash ret 26 qańtarda saǵat 12:00 shamasynda qońyraý shalǵan. Ózin uıaly baılanys kompanııasynyń qyzmetkeri retinde tanystyrǵan alaıaq qazirgi ýaqytta abonenttik nómirlerdi qaıta tirkeýden ótip jatqanyn jáne bir saǵat ishinde protsedýrany júrgizý qajet ekenin, áıtpese nómir jumys istemeıtinin aıtyp sendirgen. Áıel sheteldegi balalarymen baılanyssyz qalmaýy úshin sharttarǵa birden kelisken. Sms arqyly kelgen kodty alaıaqtarǵa bergen.
Arada 15 mınýt ótkennen keıin alaıaqtar taǵy qońyraý shalǵan. Bul joly ózderin Halyq bankiniń ókili retinde tanystyrǵan. Áıeldi qolda bar bank kartasyn jańartý qajettigin aıtyp sendiredi.
Jábirlenýshini ońaı aldaýǵa bolatynyn túsingen alaıaqtar onyń telefonyna «Kengýrý» qosymshasyn ornatýdy suraıdy. Alaıaqtardyń aıtqandaryn múdirtpesten oryndaǵan áıel depozıt shotyndaǵy aqshasynan aıyrylǵanyn bilmedi. Kelesi kúni ǵana shottyn teksergen kezde depozıttegi 5,5 mln teńge aqshasynyń urlaǵanyn túsinip, polıtsııaǵa aryzdandy.
«Qazirgi ýaqytta Aqkól aýdandyq polıtsııa bóliminiń qyzmetkerleri osy derekke qatysty alaıaqtardy anyqtaý boıynsha qajetti jedel-izdestirý is-sharalaryn júrgizýde»,- dedi vedomstvodan.
Aıta ketsek, budan buryn Aqmola oblysynda er adam jumys ornynan 34 mln teńge jymqyrǵanyn jazǵan edik.
