Internet alaıaqtar petropavldyqtyń 2,7 mln teńgesin qoldy etti
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 66 jastaǵy turǵyny ınternet alaıaqtarǵa aldanyp, polıtseılerge júgindi.
Er adamnyń aıtýynsha, oǵan belgisiz bireý telefon arqyly habarlasyp, ózin «banktiń qaýipsizdik qyzmetiniń qyzmetkerimin» dep tanystyrǵan. Klıenttiń shotynan belgisiz bireý iri kólemdegi somany almaq bolyp jatyr degen. Tranzaktsııaǵa jol bermeý úshin bank kartasynyń pın-kodyn ataý kerektigin aıtqan.
Er adam osylaısha alaıaqtardyń aldaıtynyn BAQ arqyly estigen, sol sebepti senimsizdik tanytqan. Alaıda, telefonnyń ar jaǵyndaǵy adam onyń shotynda jatqan somany jáne sońǵy ýaqytta qandaı qarjy operatsııasyn jasaǵany týraly aıtyp bergen. Qupııa aqparatty bilgendikten bank qyzmetkeri dep oılaǵan petropavldyq pın-kodyn jaıyp salyp, saldarynan bar jıǵan-tergen qarajaty – 2 mln 700 myń teńgesinen aıyrylǵan.
Bul derek «Alaıaqtyq» baby boıynsha Sotqa deıingi tergep-tekserýlerdiń biryńǵaı tizilimine tirkeldi.
«Bul jaǵdaı birinshi ret emes. Alda qylmyskerlerdiń naqty qupııa málimetti qaıdan alǵanyn anyqtaý kerek. Senimge kirý úshin, olar esimi men jasyn, JSN men úıiniń mekenjaıyn, banktegi shotynyń jaǵdaıyn aıtady. Degenmen, aqshaǵa qol jetkizý úshin olarǵa kartanyń pın-kody nemese sms-habarlamadan bir rettik qupııa sóz qajet. Bul málimetterdi alý úshin olar psıhologııalyq qysym kórsetedi. Bankke habarlaspaýǵa senimdi túrde keńes beredi. Batyl, nyq sóılesip, keıde qysymshylyq jasaýy da múmkin», - deıdi Ekinshi polıtsııa bóliminiń bastyǵy Rýslan Syzdyqov.
Mamandardyń aıtýynsha, bank qyzmetkerleri telefonmen klıentterden qupııa derekterdi eshqashan talap etpeıdi. Kúdik týǵyzǵan qońyraý shalǵan adammen abzaly sóılesýdi birden doǵarǵan jáne lezde bankke jeke júgingen durys nemese resmı saıtta kórsetilgen Call-ortalyqqa telefonmen habarlasý qajet.
