Internet-alaıaqtar almatylyqtyń atyna 7,2 mln teńge nesıe rásimdegen
Almaty qalalyq Polıtsııa departamentiniń málimetinshe, Naýryzbaı aýdanynyń turǵyny alaıaqtardyń qurbany boldy. Oǵan beıtanys adam qońyraý soǵyp aılasyn asyrǵan.
«Qońyraý shalǵan azamat ózin ekinshi deńgeıli bankterdiń biriniń qaýipsizdik qyzmetkerimin dep tanystyryp, belgisiz bireýler onyń atyna nesıe rásimdemek bolyp jatqanyn aıtqan. Áńgimelesýshi jábirlenýshini oǵan kómektesetinine birden sendirdi, biraq onyń nusqaýlaryn buljytpaı oryndaýdy talap etti. Aldymen «bank qyzmetkeriniń» talaby boıynsha jábirlenýshi telefonyna kúmándi qosymshany júktep alǵan, bul alaıaqtarǵa onyń mobıldi bankıngine qashyqtyqtan qol jetkizýge múmkindik berdi. Odan ári áńgimelesýshiniń keńesimen telefonyna ekinshi deńgeıli taǵy úsh banktiń qosymshasyn júktep alǵan. Osylaısha, olar jábirlenýshiniń atyna 7,2 mıllıon teńge kóleminde nesıe rásimdegen», – dedi Almaty qalalyq polıtsııa departamenti bastyǵynyń orynbasary Dıdar Ahanov.
Polıtsııa ókiliniń sózinshe, atalǵan qylmysty ashý úshin qalalyq krımınaldyq polıtsııa jáne Naýryzbaı aýdandyq PB-nyń qyzmetkerlerinen jedel-tergeý toby quryldy.
«Jedel-izdestirý is-sharalary barysynda alaıaqtyq jolmen alynǵan aqshany qolma-qol aqshaǵa aınaldyrmaq bolǵan 29 jáne 34 jastaǵy eki azamat ustaldy jáne qamaýǵa alyndy. Qazirgi ýaqytta alaıaqtyqtyń basqa qatysýshylaryn ustaýǵa baǵyttalǵan keshendi sharalar júrgizilip jatyr. Sotqa deıingi tergeý QR QK-niń 190-baby 3-bóligi boıynsha júrgizilip jatyr», - dedi ol.
Dıdar Ahanov QR QR QPK-niń 201-babyna sáıkes ózge aqparattar tergeý múddesine oraı jarııalaýǵa jatpaıtynyn atap ótti.
