Internet alaıaqqa 32 mln teńge nesıe alyp bergen erli-zaıypty oqıǵasyn aıtyp berdi

AQTAÝ. KAZINFORM – Aqtaýlyq Juldyz Ramazanova joldasy ekeýi ınternet alaıaqtarǵa 7 nesıe alyp bergenin kesh túsingen. Oqıǵa osydan 2 jyl buryn bolǵan. Alaıda áli kúnge deıin tergeý aıaqtalmaǵan. Jábirlenýshiniń aıtýynsha, alaıaqtar olardyń ETsQ kiltin buzyp, onlaın nesıe rásimdegen.

- Senbi kúni bolatyn. Telefonyma qońyraý shalyp, ózin Ulttyq qaýipsizdik komıtetiniń qyzmetkerimin dep tanystyrdy. «Bizge kómektesińiz, sizdiń kómegińiz kerek sebebi, bankte alaıaqtar otyr, sizdiń ústińizden onlaın kredıt rásimdep jatyr, - dedi.

Sony estigennen sol problemany sheshý maqsatymen júgirdik. Birinshi Halyq bankke jumsady, onda 5 mıllıon teńge rásimdelip tur eken. Sony óz qolymmen alyp, aıtqan esep shotqa saldym. Esep shotta Ulttyq bank dep turdy, - deıdi Juldyz Ramazanova.

Alaıaqtar munymen toqtamaı, taǵy 3 bankte aldyn ala rásimdelip turǵan 3 nesıeni aldyrǵan.

- Olar bizge banktegi alaıaqtardy osylaı anyqtaımyz dep túsindirdi. Er adamnyń qasynda áıel boldy. Ol ózin ulttyq bank qyzmetkerimin dep tanystyrdy. Qarapaıym muǵalim bolǵan soń, biz qarjyger emespiz, sózderine senip qaldyq. Ózderiniń qyzmettik kýálikterin kórsetti. Men bankte eshteńe aıtqan joqpyn, sebebi bular «bul - jasyryn operatsııa», «aqparatty qupııa saqtaý» kerek dep odan beter qorqytty. «Eshkimge aıtpa» degenge joldasyma da aıtpaı júrsem, oǵan da dál osylaı 3 nesıe aldyrǵan, - deıdi jábirlenýshi.

Osylaısha, erli-zaıyptylar bir kúnde 32 mıllıon teńgeden astam somaǵa 7 nesıe alǵan.

- Aqshany óz qolymyzben solar aıtqan esepshottarǵa salyp turdyq. Biz salǵan saıyn olar bizge «sizdiń kredıtińiz jabyldy» degen ulttyq banktyń atynan qaǵaz jiberip turdy. Sosyn biz sendik. Bizdiń nesıemiz jabylyp jatyr dep oıladyq. Olar «alaıaqtar bankte otyr, bank qyzmetkerleri ózderi sizderdi aldap jatyr. Ózderi rásimdep, sizdiń aqshany alyp ketedi qazir. Siz sol aqsha úshinshi adamǵa ketpeý úshin osy schetqa salyp turyńyz. Bul ulttyq banktiń esepshoty» degen soń sendik. Sóıtip aqshanyń bárin sol esepshotqa salyp turdyq, - deıdi Juldyz Ramazanova.

Erli-zaıyptylar alaıaqtarǵa aldanǵanyn keıin túsingen. Sebebi alaıaqtar qarajatty alyp, baılanysty úzgen.

- Polıtsııaǵa baryp, aryz bere almaı bir apta júrdik. Aqyry qabyldap, 2023 jyly 7 qazan kúni qylmystyq is ashyp, jábirlenýshi bolyp tabyldyq. Óz-ózimizge qol jumsaýǵa sál qaldyq. Tek balalarymyzdyń arqasynda aman júrmiz. Sebebi 4 balamyzdy qaıda tastaımyz? Áreń júrmiz. Densaýlyqtan aıyryldyq. Áli «shokovyı» jaǵdaıdamyz. Tergeýshi naqty eshteńe aıtpaıdy. Zańgerim eki dropper tabylǵanyn aıtty. Biri Kókshetaýda, ekinshisi Aqtóbede turatyn kórinedi. Biraq ázirge eshqandaı nátıje joq, - deıdi aqtaýlyq turǵyn.

Jábirlenýshi erli-zaıypty nesıelerin 1 jyl boıy tólegen. Biraq ol qarajat nesıeniń paıyzyn ǵana jabýǵa jumsalyp, negizgi qaryz azaımapty.

- Bizden bankter bir jyldaı aqsha ustap turdy. Sosyn toqtatyldy. Negizinde, qylmystyq is qozǵalǵan soń, bank aqsha alýdy toqtaýy tıis eken. Biraq bankter qylmystyq is júrip jatqanyn bile tura, telefon shalyp, mazalaıdy. Bank te, kollektorlar da siz aqshany tóleýge tıissiz dep shyǵaryp salady, - deıdi jábirlenýshi.

Osy oqıǵa boıynsha, Mańǵystaý oblystyq Polıtsııa departamenti tergeý amaldary júrip jatqanynyn habarlady.

- Alaıaqtyq deregi boıynsha qylmystyq is qozǵaldy. Jan-jaqty tergeý amaldary júrgizilip jatyr, - delingen habarlamada.

Internet alaıaqtarǵa ońbaı aldanǵan Juldyz Ramazonova kópshilikke beıtanys nómirge jaýap bermeýge keńes berdi.

- Ata-ana, bala-shaǵanyń nómirin tanımyz ǵoı. Basqa bóten nómirge tipti jaýap bermeý kerek. Al osyndaı jaǵdaıǵa ushyraǵan azamattarǵa aıtarym, birinshi polıtsııaǵa aryz jazǵanda, qaýly shyǵady, jábirlenýshi bolyp tabylady dep, sol qaýlyny bankke aparý kerek. Tek sonyń arqasynda bank qaryzdy ósirýdi toqtady, - deıdi Juldyz Ramazanova.

Buǵan deıin, Qyzylorda polıtseıleri ınternet alaıaqtyqpen aınalysqan kıberqylmystyq topty ustaǵan bolatyn.