Internatsıonal otbasynda toılanatyn mereke eki ese kóp – memlekettik qyzmetshi
- Anaıt, oqyrmanǵa ózińizdi tanystyryp ótseńiz. Jalpy esimińiz qandaı maǵyna beredi ?
- Meniń esimim – armıan ańyzdarynda kezdesetin qunarlylyq pen mahabbat qudaıy, júrek dep te aýdarylady. Bul esimdi maǵan ákem qoıǵan eken. Ákem – Artýr Zavenovıch, ulty armıan. Anam Nurǵaısha Serbaıqyzy – qazaq. Men, ápkem ekeýimiz Qyzyljar aýdany Presnovka eldi mekeninde dúnıege keldik. Balalyq shaǵymyz baqytty boldy. Áke-sheshem erkeletip ósirdi, únemi qoldap, meniń tańdaýyma qulaq asatyn. Mektep bitirip, mamandyq tańdaǵan kezde de tańdaýdy ózime berdi. Osylaısha Manash Qozybaev atyndaǵy SQÝ «týrızm» mamandyǵy boıynsha grantpen oqýǵa tústim. Ony «qyzyl» dıplomǵa bitirip, syrttaı oqýǵa «qarjyger» mamandyǵyna qujattarymdy tapsyrdym. Qazir meniń eki joǵary bilimim bar.
Eńbek jolymdy týǵan aýylymda, aýyl ákimdiginde bastadym. Ol jerde bastapqyda kelisimshart boıynsha jumys istedim, tájirıbe jınaǵannan keıin memlekettik qyzmetke aýystym. Qazir Qyzyljar aýdany ákimdiginde býhgalter bolyp eńbek etip jatyrmyn. Ár jumystyń óz qıyndyǵy bolady. Býhgalterııada maǵan dáldik unaıdy.
- Qatelespesem, kózińizde kinárat bar?
- Iıa, bala kezimnen kózim nashar kóredi. Biraq bul maǵan jaqsy bilim alýǵa, bilikti maman bolýǵa esh kedergi bolmady. Sol úshin ata-anama alǵys aıtamyn.
- Ata-anańyz qalaı tanysqan?
- Ákem men anam tanysqanda 22-23 jasta bolǵan eken. Ákem Artýr Zavenovıch Taýly Karabaqta týǵan. Qazaqstanǵa qurylysqa kelgen. Bizdiń Presnovka eldi mekeninde aýyl klýbyn jáne basqa da áleýmettik nysandardy saldy. Anam ekeýi osylaısha aýylda tanysady. Keıin ákem jumystaryn bitirip, eline qaıtady. Biraq qaıtyp kelip, anama úılenedi.
Úılengennen keıin alǵashqy eki jyldy olar Taýly Karabaqta ótkizedi. Keıin Qazaqstanǵa qaıtap oralyp, osy jaqta qonystap qalǵan eken.
- Otbasyńyzda salt-dástúrge, dinı ustanymǵa baılanysty kelispeýshilik bolyp turmaı ma?
- Joq, ınternatsıonal otbasy bolǵanymyzben eshqandaı túsinispeýshilik bolmaıdy. Árqaısy ekinshi jaqtyń salt-dástúrin qurmetteıdi. Bizde basqalarǵa qaraǵanda toılanatyn mereke eki ese kóp. Mysaly aıt meıramyn da, pashany da otbasymyzda atap ótemiz. Baýyrsaq pisiremiz, jumyrtqa boıaımyz.
– Qazaq, armıan tilderin bilesiz be?
- Keremet jaqsy bilemin dep aıta almaımyn. Anamnyń týǵan-týystarynyń, naǵashylarymnyń arasynda óskendikten, bul til kishkentaıymnan qulaǵyma sińdi. Mektepte de qazaq tilin meńgerdik. Aýyzeki sóılese alamyn, túsinemin. Al armıan tilin meńgerýge endi den qoıdym. Bilgim, úırengim keledi. Qazirgi ýaqytta repetıtormen jumys istep, meńgerip jatyrmyn.
- Sportqa qalaı keldińiz?
- Sportpen arnaıy shuǵyldanǵan emespin. Mektepte, keıin ýnıversıtette dene shynyqtyrý sabaqtary boldy. Alaıda ol kezde jarysqa qatysqan emespin. Al jumysqa ornalasqannan keıin 2013 jyly spartakıadaǵa qatysý kerek boldy. Bári sodan bastaldy. Qazir sporttyq oıyndardy qaldyrmaımyn.
Basynda doıby oınap júrdim. Keıin áriptesterim qysqa qashyqtyqqa júgirip kórshi dep ótinish tastady. Uzyndyqqa sekirip kórdim. Nátıjem jaman bolmady.
- Sportta jaqsy jetistikterge qol jetkizip úlgeripsiz...
- Iıa, maqtanyp aıtarlyqtaı jetistikterim bar. 2017 jyly Atyraýda ótken respýblıkalyq jarysqa qatysyp, uzyndyqqa sekirýden 2-oryn, 100-200 metr dıstantsııaǵa júgirýden 3-oryn aldym. Budan basqa oblystyq jarystardyń júldegerimin.
Iıa, kózim basqalarǵa qaraǵanda nashar kóredi. Biraq bul maǵan qalypty ómir súrýge eshqandaı yńǵaısyzdyq týdyrmaıdy. Eń bastysy qajet kezde únemi qasymnan tabylatyn ata-anam bar. Ázirge turmys qurǵan joqpyn, armanym óz otbasymdy quryp, jaqyndarym men týǵandarymnyń arasynda baqytty ǵumyr keshý.
- 23 maýsym - Memlekettik qyzmetshiler kúni. Áriptesterińizge ne tiler edińiz?
- Aldymen, myqty densaýlyq jáne bizdiń qıyn jumysta shydamdylyq, alǵa qoıǵan maqsatqa jetýdi tileımin! Shańyraqtaryńyzdan bereke-birlik ketpesin!
- Áńgimeńizge rahmet!
