Internatsıonal otbasynda dastarhan basyna jınalatyn sebep kóp – Alekseı Nogaı
NUR-SULTAN. QazAqparat – Astanalyq tártip saqshysy Alekseı Nogaı el tynyshtyǵy úshin 7 jyldan astam qyzmet etip keledi. Polıtsııa kapıtanynyń otbasy úshin 1 mamyr — aıtýly mereke. Osy oraıda QazAqparat tilshisi polıtsııa kapıtanymen tildesken edi.
Alekseı Nogaı — Túrkistan oblysynyń týmasy. Qazaq tilin jetik meńgergen. 2009 jyly Almatydaǵy Ekonomıka jáne statıstıka akademııasynyń esep jáne aýdıt fakýltetin bitirgen.
2012-2013 jyldary otan aldyndaǵy áskerı mindetin ótegen. Armııadan soń ishki ister organdarynda eńbek etemin dep sheship, 2015 jyly batalon polkinde dıplomatııalyq ókilder kúzetshisi bolyp taǵaıyndalady.
Qazir Alekseı Nogaı elordada arnaıy batalon qyzmetiniń aǵa ınspektory.
«Qazaqı ortada óskendikten memlekettik tildi jaqsy meńgergenmin. Degenmen orys mektebin bitirdim. Áıelim qazaq. 2 qyzym bar, olardy qazaq balabaqshasyna berdik. Otbasymyzda eki (qazaq, káris) ulttyń da salt-dástúrin birdeı ustanamyz. Balalarymdy da ata dástúri men tildi qurmetteýge úıretýdemiz», - deıdi Alekseı Nogaı.
Tártip saqshysy, bos ýaqytynda kompıýterlik baǵdarlama ázirleýmen aınalysady.
«Qazaqstanda birneshe ult ókilderi tatý-tátti ómir súrip jatyr. Oǵan dálel — meniń dostarym. Meniń qazaq, orys, uıǵyr, ózbek jáne basqa ult ókilderinen jaqyn aralasatyn dostarym bar. Ultymyz basqa bolsa da bir tilde sóıleımiz, biz úshin ortaq dúnıe kóp. Bireýdi kemsitý degen joq. Internatsıonal otbasynda dastarhan basyna jınalatyn sebep kóp. Dastarhan basyna mereke kúnderi jáne basqa da aıtýly kúnderi jıi jınalyp turamyz. Sol sııaqty mahabbat ultqa qaramaıdy, bastysy syılastyq pen ózara qurmet bolýy kerek», - deıdi ol.
Alekseı Nogaı kópultty Qazaqstan elinde týyp, turyp jatqanyn maqtan tutady. Onyń aıtýynsha, elimizde ár ult ókiline qurmet erekshe.
Sondaı-aq, barsha qazaqstandyqtardy búgingi merekemen quttyqtap, yrys-yntymaq tileıdi.
