Intern-dárigerlerdiń kásibı jaýapkershiligin saqtandyrý tetigi engiziledi
ASTANA. KAZINFORM — Densaýlyq saqtaý mınıstriniń birinshi orynbasary Tımýr Sultanǵazıev Senat otyrysynda ıntern-dárigerlerge medıtsınalyq aqparat júıelerine kirýge ruqsat beriletinin aıtty.
— Zań deńgeıinde birinshi ret «klınıkalyq tálimgerlik» uǵymy engizilip otyr. Bul jas mamandy baýlıtyn dárigerdiń mártebesin aıqyndaý úshin kerek. Mártebemen birge yntalandyratyn sharalar da kózdelgen. Dárigerge ınterndi qosaqtap berý qosymsha júkteme emes, kerisinshe qosymsha kómek. Intern-dárigerler birtindep qosymsha klınıkalyq quzyretter men tájirıbe ıgerip, tálimgerine kómektesedi. Bul zańda ıntern-dárigerge medıtsınalyq aqparat júıelerine kirý múmkindigi beriledi, — dedi ol.
Birinshi vıtse-mınıstr alǵash ret ıntern-dáriger men tálimger dárigerdiń kásibı jaýapkershiligi saqtandyrý tetigi engiziletinin de aıtty.
— Osy arqyly bir jaǵynan naýqastyń, ekinshi jaǵynan jas mamannyń qaýipsizdigin qamtamasyz etemiz. Internatýra deńgeıindegi mamandardy daıarlaý isin áýelde alǵashqy medıtsınalyq-sanıtarlyq kómek jáne aýyldaǵy densaýlyq saqtaý salalarynda bastaýdy josparlap otyrmyz. Al joǵary tehnologııany meńgerýdi talap etetin mamandardy daıarlaý rezıdentýra aıasynda iske asady, — dedi Tımýr Sultanǵazıev.
Aıta keteıik, búgin Senat depýtattary ulttyq zańnamaǵa densaýlyq saqtaý máseleleri boıynsha ózgerister men tolyqtyrýlar engizetin zań men oǵan ilispe qujatty eki oqylymda maquldady.
Sonymen qatar Senat muǵalimdi artyq júktemeden bosatatyn zańdy bekitti.
