«Intergaz Ortalyq Azııa» AQ Qyzylordadaǵy basqarmasy dırektorynyń birinshi orynbasary sottaldy

QYZYLORDA. KAZINFORM – Qyzylorda qalalyq soty «Intergaz Ortalyq Azııa» aktsıonerlik qoǵamy Qyzylorda magıstraldyq gaz qubyrlary basqarmasy dırektorynyń birinshi orynbasary N.Nurbolatulyna qatysty úkim shyǵardy.

«Ol „Orda Glass LTD“ jaýapkershiligi shekteýli seriktestiginiń smetalyq qunyn asyra baǵalaý jáne „Shyny zaýytyn rezervtik gazben jabdyqtaý gaz qubyryn salý“ obektisi boıynsha oryndalǵan jumystardyń jalǵan aktilerine qol qoıý arqyly 60,1 mln teńge somasynda múliktik zalal keltirgeni úshin kináli dep tanyldy», — dep jazdy Antıkordan.

Sonymen qatar, ol obektini salý kezinde jergilikti mańyzy bar avtomobıl joly ýchaskesin mehanıkalyq kesý arqyly memlekettik múlikke qasaqana zaqym keltirgeni úshin sottaldy.

Sot úkimimen Nurbolatulyna 2 jyl 6 aı bas bostandyǵynan aıyrý jáne kvazımemlekettik sektor sýbektilerinde laýazym atqarýǵa 3 jyl merzimge tyıym salý jazasy taǵaıyndaldy.

Sot úkimi zańdy kúshine engen joq.