«INTERFOOD» saýda úıi kógergen taýyq etine qatysty túsinikteme berdi
ALMATY. QazAqparat - «INTERFOOD» saýda úıi áleýmettik jelide jarııalanǵan kógergen taýyq etiniń sýretine qatysty túsinikteme berdi, dep habarlaıdy QazAqparat tilshisi.
Tutynýshy Maıra Seıiljanova (aty-jóni ózgertilgen) Іnstagram jelisiniń zhest_kz pablıginde 2018 jylǵy 1 shildede kógerip ketken taýyq etiniń sýretin jarııalaǵan bolatyn.
«Búgin Abaı kóshesindegi Promenade saýda úıinde boldyq. «INTERFOOD» sýpermarketinde osymen ekinshi ret kógergen, sasyǵan taýyq etin kórip turmyz. Muzdatqysh túgel sasyp ketken. Osydan bir apta buryn osy ónimdi kórsetip ketkenmin qyzmetshilerge. Bir aptadan soń qaıtyp kelsek, túk ózgermegen. Týra sol ónim sol kúıinde jatyr. Datasyn jańartyp qoıǵan», - dedi jazba avtory.
Tutynýshy jazba astyna atalǵan ónimniń sýretin jarııalaǵan.
QazAqparat tilshisi atalǵan jazbaǵa baılanysty «INTERFOOD» sýpermarketter jelisi basshylyǵyna arnaıy saýal joldaǵan bolatyn. Saýda jelisi mundaı derektiń bolǵanyn rastady.
«4-shildede keshki 19:00-de «INTERFOOD» saýda úıiniń eki aýysymynyń da qyzmetkerleri men aryz túsirgen tutynýshy shaqyryldy. Kezdesý kezinde klıentter eskertý jasap ketken qyzmetkerlerdi tanydy. Qyzmetkerler aqparatty jasyryp qalǵan. Sol kúni joıylýy tıis taýarlardyń arasynan sýrettegi taýyqtyń eti tabyldy. Alaıda ol klıent aıtqandaı kógergen, bolmasa sasyq emes. Bul ónim negizi merzimi ótýine baılanysty joıylýǵa jiberilýi tıis bolatyn», - dedi saýda jelisiniń marketıng jáne elektrondy kommertsııa bóliminiń basshysy Anna Belıaeva.
Olar joıylýy tıis taýyq etiniń negizgi salqyndatylǵan tońazytqyshtan qalaı tabylǵanyna ań-tań.
«Osy derekti anyqtaý úshin barlyq kameralardaǵy vıdeo tekserildi. Alaıda, naqty kimniń bul ónimdi ákelip qoıǵany anyqtalmady», - dedi ol. Degenmen, olar ónim syrtyndaǵy jaramdylyq merziminiń ózgertilmegenin aıtty.
INTERFOOD sýpermarketi qyraǵylyq tanytqan klıentterge alǵys aıtyp, ótemaqy retinde syılyq bergen.
Sonymen qatar, barlyq laýazymdy tulǵalarǵa aıyppul salyndy.
Aıyppul somasy eskertý jasaǵan klıentke ótemaqy retinde beriletin bolady.
Al qalalyq Qoǵamdyq densaýlyqty saqtaý departamentiniń mamandary aıtqandaı, jyl basynan beri Almatyda 28 adam sapasyz azyq-túlik satyp alǵanyn aıtyp, shaǵymdanǵan.
QR DSM 2010 jylǵy 24 qyrkúıektegi «Tez buzylatyn azyq-túlikti saqtaýdyń sanıtarlyq epıdemıologııalyq talaptary» buıryǵyna sáıkes muzdatylǵan qus eti -18 temperatýrasynda 20 táýlik, al salqyndatylǵan qus eti gaz ortasy bar vakýým ydysta +2-+6 grdýs arasynda 7 táýlik saqtalýy tıis.
Aıta ketý kerek, bul oqıǵa birinshi ret kezdesip otyrǵan zań buzýshylyq emes. Saýda orny buryn da osyndaı olqylyǵy úshin aıyppul tólegen.
«2016 jyly atalǵan saýda úıinde taǵy bir zań buzýshylyq tirkelgen bolatyn. Munda 9 synama jasalyp, «Allel Agro» JShS «Boıler balapany» ónimi daıyndaý merziminsiz satylyp kelgeni anyqtaldy. Osyǵan baılanysty ákimshilik sotynda 2017 jyly qarashada 1 060 500 aıyppul salynǵan bolatyn», - dedi qalalyq qoǵamdyq densaýlyqty saqtaý departamentiniń ókili Qarlyǵash Álibaeva.
