InterFood Astana 2026: Astanaǵa 12 eldiń azyq-túlik jáne tamaq ónerkásibiniń ókilderi jınalady
ASTANA. KAZINFORM - 2026 jylǵy 13–15 mamyr aralyǵynda Astana qalasyndaǵy MVTs EXPO Halyqaralyq kórme ortalyǵynda «InterFood Astana 2026» – «Azyq-túlik ónimderi, sýsyndar, ıngredıentter, qaptama jáne tamaq ónerkásibine arnalǵan jabdyq» atty 26-shy Qazaqstan halyqaralyq kórmesi ótedi.
QR Aýyl sharýashylyǵy mınıstrligi baspasóz qyzmetiniń habarlaýynsha, kórme dástúrli túrde Qazaqstandaǵy negizgi salalyq alańdardyń biri bolyp tabylady jáne ol azyq-túlik óndirýshilerin, jabdyq jetkizýshilerin, qaıta óńdeý ónerkásibi ókilderin, bólshek saýda men memlekettik qurylymdardy biriktiredi. Іs-sharaǵa álemniń 12 elinen shamamen 80 kompanııa qatysady.
Ekspozıtsııa azyq-túlik jáne sýsyn óndirisinen bastap ıngredıentterge, qaptama sheshimderine jáne tamaq ónerkásibine arnalǵan zamanaýı tehnologııalyq jabdyqtarǵa deıingi keń aýqymdy baǵyttardy qamtıdy. InterFood Astana kórmesiniń ereksheligi — salany keshendi túrde tanystyrý, ıaǵnı óndiris pen qaıta óńdeýdiń tolyq tsıklin kórsetý.
Kóp jyldan beri InterFood Astana kórmesi agroónerkásiptik keshen salasyndaǵy memlekettik saıasattyń basym baǵyttaryn júzege asyratyn tıimdi kásibı alań bolyp keledi.
Forýmnyń kún tártibi eldiń strategııalyq qujattarynda jáne Memleket basshysynyń tapsyrmalarynda aıqyndalǵan mindettermen tikeleı baılanysty jáne tamaq jáne qaıta óńdeý ónerkásibin damytýǵa arnalǵan praktıkalyq sheshimder ázirleýge baǵyttalǵan.
Eki kún ishinde Qazaqstannyń et jáne sút salasyna qatysty máseleler talqylanady.
Aýyl sharýashylyǵy ónimderin tereń óńdeý, qosylǵan qundy arttyrý, zamanaýı tehnologııalardy engizý jáne otandyq óndirýshilerdiń eksporttyq áleýetin keńeıtý máselelerine erekshe nazar aýdarylady.
Іskerlik baǵdarlamanyń basty oqıǵasy — Qazaqstandaǵy alǵashqy halyqaralyq Meat & Dairy Industry Forum bolady.
Kórme aıasynda sondaı-aq Rıteıl-dıstrıbıýtor ortalyǵy uıymdastyrylady — bul azyq-túlik jetkizýshileri, saýda jelileri jáne dıstrıbıýtorlar arasyndaǵy kelissózderge arnalǵan arnaıy alań. Bul format qatysýshylarǵa tikeleı iskerlik baılanys ornatýǵa, ótkizý arnalarynyń keńeıýine jáne yntymaqtastyq sharttaryn talqylaýǵa múmkindik beredi.
Sonymen qatar «Dástúrler sapasy» atty azyq-túlik ónimderi men sýsyndardyń kásibı degýstatsııalyq baıqaýy ótedi. Baıqaý qorytyndysy boıynsha úzdik óndirýshiler altyn medaldarmen marapattalady.
Uıymdastyrýshylardyń aıtýynsha, InterFood Astana — tek kórme ǵana emes, sonymen qatar salalyq bastamalardy talqylaıtyn, memleket pen bıznes arasyndaǵy kelisilgen tásilderdi ázirleıtin jáne Qazaqstannyń tamaq jáne qaıta óńdeý ónerkásibindegi reformalardy is júzinde qoldaıtyn jumys alańy.
Osyǵan deıin azyq-túlik baǵasyn budan bylaı jasandy ıntellekt baqylaıtyny týraly jazdyq.
