Interaktıvti jer telimderiniń kartasy qaraǵandylyq kásipkerlerge kómegin tıgizýde
QARAǴANDY. QazAqparat - Qaraǵandy oblysynda kásipkerler arasynda jer telimderiniń ınteraktıvti kartasy tanymal boldy. Ol aımaqtyq Kásipkerler palatasy men jergilikti atqarý organdarynyń birlesip qurǵan dúnıesi, dep habarlaıdy óńir basshysynyń resmı saıty.
Karta https://mapkaraganda.atameken.kz/ ınternet-resýrsynda jarııalanǵan. Búgingi tańda onda bıznes júrgizýge arnalǵan 300 jýyq jer telimderi bar. Atalmysh jańashyldyq kásipkerlerge óz jobalaryn júzege asyrýǵa bos oryndar izdestirýde kómegin tıgizedi. Onlaın rejimde olar ınfraqurylymmen tanysa alady (jylý jelileri, sýmen qamtý jáne elekt qýatynyń tartylýy).
Buǵan qosa, iri kásiporyndardyń bos turǵan alańdarynda bıznes-ınkýbator uıymdastyrý boıynsha jumystar atqarylyp jatyr. Sondaı-aq toqtap qalǵan ónerkásiptik nysandar men bankterde kepilde turǵan, satylatyn nysandardy da kórýge bolady. Mundaı alańdar aımaqta 50 jýyq.
Onlaın-karta jer qory men jyljymaıtyn múlik nysandary týraly aqparatty anaǵurlym móldir ári qoljetimdi etetindigi taǵy bar. Tizimde oblystaǵy 9 aýdan men 9 qaladaǵy aýktsıonǵa qoıylǵan nemese jaqyn arada satylatyn bos jer telimderi de kórsetiledi.
- Júıe 2017 jyldyń qarashasynan beri sátti qyzmet etip keledi. Barlyǵy jyl basynan beri oblys boıynsha bıznesti damytýǵa 742 jer telimi berilgen, onyń 119-y aýktsıon arqyly jáne 623-i baıqaý arqyly, - deıdi Qaraǵandy oblystyq Kásipkerler palatasynyń jetekshisi Ernar Kúlpeıisov.
Buǵan qosa, oblys ákimdigimen saıtty memlekettik organdardan qajetti aqparattarmen qamtý máselesine qatysty belsendi jumystar atqarylyp jatyr.
Aıta ketken jón, karta únemi jańartylyp, nysandar jaıly maǵlumattar men onyń sıpattamasy udaıy berilip otyrady.
