Interaktıvti taqtalar túlekterdiń kórý qabiletin nasharlatýda - Qorǵanys mınıstri

Qorǵanys mınıstri sońǵy ýaqyttary áskerge shaqyrý naýqany kezinde kóz kórý qabileti tómen túlekterdiń kóbeıgenin tilge tıek etti.
«Interaktıvti taqtalarǵa qatysty suraǵym bar. Qarýly kúshterge shaqyrý kezinde kórý qabileti tómen jastar kóp keledi. Mektepte oqýshylardyń kórý qabiletine áser etpeý úshin ınteraktıvti taqtalardyń sapasy artýy tıis», - dedi ol Bilim mınıstri Erlan Saǵadıevke qaratyp aıtqan sózinde.
Óz kezeginde QR BǴM basshysy ınteraktıvti taqtalar «E-learning» baǵdarlamasy aıasynda ornatylǵanyn atap ótti. Qazirgi ýaqytta basqa balama joly tabyldy.
«Olar óte qymbat turady jáne sonshalyqty tıimdi emes. Biz bıyl 11 myń vıdeo-úshtik satyp alamyz. Ol kompıýter, proektor jáne ekrannan turady. Kompıýter mekteptegi server retinde qoldanylady. Proektor men ekran ınteraktıvti taqtalardy almastyrady. Bul sheshim kózge qaýipsiz ári birshama arzan», - dep jaýap berdi Saǵadıev.
Atalmysh vıdeo-úshtik bıyldan bastap satyp alynady jáne birinshi ınternetke shyǵý múmkindigi joq shalǵaı jatqan aýyldar men aýdandardyń mektepterine ornatylady.
2018 jyly bul jıyntyqtyń taǵy 12 000 danasy satyp alynbaq. Aýyldyq mektepterdi álemdik tájirıbege sáıkes, eń úzdik beınesabaqtarmen qamtamasyz etý maqsaty qoıylǵan. Búgingi tańda balalarǵa arnalǵan úsh tilde 50 myńǵa tarta beınesabaq ótkiziledi.