«Inter» Chempıondar lıgasy fınalyna joldama aldy

ASTANA. KAZINFORM - Italııanyń «Inter» komandasy UEFA Chempıondar lıgasy fınalyna joldama aldy. Olar jartylaı fınalda Ispanııanyń «Barselona» komandasyn 4:3 esebimen jeńdi.

Kezdesý barysynda alǵashqy mınýttan qos komandanyń belsendiligi baıqalyp turdy. Jyldam gol soǵýǵa umtylǵan olar bir-biriniń qaqpasy mańynda jıi boı kórsetti. Dese de birinshi kezeńde ıtalııalyq klýbqa sáttilik serik boldy.

Oıynnyń 21-mınýtynda «Inter» sapynan argentınalyq shabýylshy Laýtaro Martınes mergendik tanytty. Al 45-mınýtta «Barselona» qaqpasyna belgilengen penaltıden Hakan Chalhanoglý múlt ketken joq. 

Fınalǵa beriletin joldamanyń qoldan sýsyp bara jatqanyn uqqan ıspanııalyq klýb ekinshi kezeńde birden shabýylǵa shyqty. Olardyń qatarynan Erık Garsııa 56-mınýtta esep aıyrmasyn qysqartsa, Danı Olmo 60-mınýtta tarazy basyn teńestirdi. 

Olar odan keıin de jıi shabýyl uıymdastyrdy. Osyndaı sáttiń birinde Rafınıa 88-mınýtta «Barselonany» alǵa shyǵarsa, 93-mınýtta ıtalııalyq klýbtan Franchesko Acherbı qaqpany dál kózdedi.

Osylaısha negizgi kezeń 3:3 esebimen teń aıaqtalyp, oıyn qosymsha kezeńge jalǵasty. 
Qosymsha kezeńniń 99-mınýtynda Davıde Frattezı soqqan gol «Interge» jeńis alyp keldi. Nátıjesinde olar fınalǵa joldaam aldy.

Eki komanda arasyndaǵy alǵashqy kezdesýde 3:3 esebi tirkeldi. 

Endi 7 mamyrda «Parı Sen-Jermen» (Frantsııa) men «Arsenal» (Anglııa) jasyl alańǵa shyǵady. Alǵashqy oıynda frantsııalyq komanda 1:0 esebimen basym túsken edi.

Fınal 31 mamyrda Germanııanyń Mıýnhen qalasyndaǵy «Mıýnhen arena» stadıonynda bolady.