Intellektýaldy júıe: Úleskerler problemasy tolyǵymen sheshiledi

  ASTANA. QazAqparat - Astanadaǵy iri qurylys kompanııalarynyń biri jyljymaıtyn múlik boıynsha ıntellektýaldy júıeni ázirleýge kiristi, dep xabarlaıdy QazAqparat tilshisi.

«Intellektýaldy júıe» degenimiz ne? Bárimiz bilemiz, búginde jyljymaıtyn múlikti satý salasynda alaıaqtyq áreketter az emes. Al ıntellektýaldy júıe ondaı áreketterge jol bermeıdi. Sebebi barlyq qujattar elektrondy formatta bolady», - dedi kompanııa basshysy Aıdyn Raxymbaev búgin Astana Innovation Challendge jobasy aıasyndaǵy kezdesýde.

Onyń aıtýynsha, atalǵan jobany aldymen Astana boıynsha iske asyrý kózdelip otyr. Sodan keıin ony respýblıkaǵa taratý josparlanǵan.

«Barlyǵy tsıfrlyq úlgide bolady. Qazir úıdiń jobasyn aýystyrý, shaǵyn dúkendi salý jáne taǵy basqa jumystarǵa aqsha da, ýaqyt ta kóp ketedi. Al ıntellektýaldy júıede bunyń barlyǵy avtomatty túrde jasalady. Atalǵan júıeniń negizgi maqsaty - barlyq jyljymaıtyn múlikti blokcheın texnologııalaryna aýystyrý. Bul degenimiz, úıdi satyp alǵanda notarıýstyń da qajeti joq. Blokcheın arqyly kelisimdi rásimdep, aqshasyn tólep berýge bolady. Intellektýaldy júıede tirkeýge turmaǵan qurylys kompanııalary óz qyzmetterin usyna almaıdy. Demek, úleskerler máselesi tolyǵymen sheshiledi», - dep atap kórsetti A.Raxymbaev. 

Aıta keteıik, Astana Innovation Challendge jobasy aıasyndaǵy kezdesýge QR Premer-Mınıstriniń orynbasary Asqar Jumaǵalıev te qatysyp, jas ınnovatorlarǵa óz keńesin berdi.

Al Astana qalasynyń ákimi Áset Isekeshev «aqyldy PIK» júıesin engizýdi kózdeıdi.