Insýltten keıin alǵashqy qadam: neıroınterfeıs naýqastyń júrýine kómektesti

ASTANA. KAZINFORM – Qytaıdaǵy Gýansı medıtsına ýnıversıtetiniń Birinshi aýrýhanasynyń ońaltý bóliminde aýyr ınsýlt alǵan patsıent mı sıgnaldary arqyly basqarylatyn júıeniń kómegimen alǵashqy sanaly qadamyn jasady, dep habarlaıdy Sınhýa agenttigi.

48 jastaǵy, denesiniń sol jaq bóligi sal bolyp qalǵan er adam neıroınterfeıs, julyndy stımýlıatsııalaý júıesi jáne robottandyrylǵan ekzoskeletten turatyn keshendi paıdalandy. Ol tek qozǵalysqa zeıin qoısa jetkilikti boldy – júıe mı sıgnalyn oqyp, qadam jasaý protsesin iske qosty.

Bul – óńirde oı arqyly berilgen komandanyń tikeleı fızıkalyq áreketke aınaldyrylǵan tolyq ıntegratsııalanǵan tehnologııasynyń alǵashqy qoldanylý jaǵdaıy. Joba Qytaıda neıroınjenerlik sheshimderdiń zerthanadan klınıkalyq tájirıbege jedel engizilip jatqanyn kórsetedi.

Insýltten keıin patsıent aýyr gemıplegııa men spastıkalyq sal aýrýyna shaldyqqan. Bir jylǵa jýyq júrgizilgen dástúrli ońaltý aıtarlyqtaı nátıje bermegen. Jańa tásil patsıentti emdeý protsesiniń belsendi qatysýshysyna aınaldyrdy: mı sıgnaldary bulshyqet túıilýin azaıtatyn stımýlıatsııany iske qosady, al ekzoskelet qozǵalysty oryndaýǵa kómektesip, keri baılanys qalyptastyrady.

Neırohırýrg Fen Datsınniń aıtýynsha, júıe nıet pen qozǵalystyń arasyndaǵy «tsıfrlyq kópir» ispetti jumys isteıdi. Jattyǵý bastalǵannan keıin eki apta ótken soń patsıent tizesin óz erkimen búge bastady jáne qolyn kótere alǵan.

Tehnologııa ınvazıvti emes ınterfeıske negizdelgen, ıaǵnı ımplanttardyń ornyna syrtqy elektrodtar qoldanylady. Bul hırýrgııalyq ádistermen salystyrǵanda dáldigin sál tómendetkenimen, tásildi qaýipsiz ári klınıkalyq qoldanýǵa qoljetimdi etedi.

Neıroınterfeısterdi damytý Qytaı medıtsınasynyń basym baǵyttarynyń birine aınaldy. 2025 jyly elde arnaıy ortalyqtar ashylyp, klınıkalyq synaqtar bastaldy, al retteýshi organdar mundaı tehnologııalardy medıtsınalyq qyzmetterdiń jeke sanatyna engizdi. Alǵashqy kommertsııalyq maquldanǵan ınvazıvti neıroınterfeıs Tsınhýa ýnıversıtetiniń qatysýymen ázirlengen.

Bul baǵytqa qyzyǵýshylyq máseleniń aýqymymen de baılanysty: Qytaıda ınsýlt alǵan ondaǵan mıllıon patsıent bar. Sheteldegi keıbir jobalar ımplanttarǵa basymdyq berse, Qytaı klınıkalary operatsııasyz ádisterge kóbirek mán berip otyr.

Mamandar bul tehnologııany Parkınson aýrýyn qosa alǵanda, basqa da nevrologııalyq syrqattardy emdeýde qoldanýdy, sondaı-aq Ońtústik-Shyǵys Azııa elderindegi halyqaralyq medıtsınalyq baǵdarlamalarǵa engizýdi josparlap otyr.

Ázirge patsıent múgedekter arbasymen qozǵalady, biraq kúndelikti jattyǵýlaryn jalǵastyryp keledi. Óz kúshiniń kómegimen jasalǵan árbir jańa qadam ol úshin joǵalǵan fýnktsııalardy birtindep qalpyna keltirýge bolatynynyń dáleli bolyp otyr.

Eske sala keteıik, Qazaqstanda ınsýlttan bolatyn ólim-jitim kórsetkishi 25%-ǵa azaıdy.