Instıtýtsıonaldyq demokratııa baǵyty: elimizdegi konstıtýtsııalyq reforma jóninde seýldik sarapshynyń kózqarasy
ASTANA. KAZINFORM – Jańa Konstıtýtsııa jobasy – zań qujaty ǵana emes, tereń saıası transformatsııanyń kórinisi. Mundaı pikirdi «Orta Azııa – Koreıa Respýblıkasy» dostyq qaýymdastyǵynyń tóraıymy Lı Ok Ren bildirdi.
Sarapshy Qazaqstandaǵy ınstıtýtsıonaldyq demokratııanyń bekip kele jatqanyn aıtady. Onyń sózinshe, elimiz burynǵy sýperprezıdenttik júıeden bılik ınstıtýttarynyń tepe-teńdigi saqtalatyn prezıdenttik júıege aýysyp jatyr.
– Reformanyń basty elementi – Memleket basshysynyń qolynda sheksiz quzyret bolmaıdy. Zań shyǵarýshy bıliktiń yqpaly kúsheıip, sheshim qabyldaý úderisi ınstıtýtsııalandyrylyp keledi, – deıdi Lı Ok Ren.
Ońtústikkoreıalyq mamannyń pikirinshe, vıtse-prezıdent ınstıtýtynyń engizilýi – halyqaralyq qaýymdastyq pen ınvestorlarǵa eldiń saıası turaqtylyǵy jóninde mańyzdy belgi. Óıtkeni bul ınstıtýt «saıası vakýýmnyń» paıda bolýyna jol bermeıdi. Sondaı-aq bılik aýysýy kezindegi naqty tártipti qamtamasyz etip, bılik izbasaryn belgileıdi.
Sarapshy reformanyń taǵy bir ozyq qyryn atap ótti. Onyń aıtýynsha, jańa Ata zań jobasy adam quqyǵyn qorǵaý júıesin kúsheıtedi. Qujattaǵy kinásizdik prezýmptsııasy, bilikti advokat kómegine júginý quqyǵy, zańsyz alynǵan dálelderge qoldanýǵa tyıym tárizdi normalar halyqaralyq standarttarǵa saı.
– Ásirese, «tsıfrlyq konstıtýtsıonalızmge» aıryqsha nazar aýdarýǵa bolady. Jahandyq tsıfrlandyrý dáýirinde jeke derekterdi qorǵaý, baılanys jáne qarjylyq aqparatty qupııa saqtaý máselelerin konstıtýtsııalyq deńgeıde bekitý Qazaqstandy álemdegi aldyńǵy qatarly quqyqtyq júıesi bar elderdiń qataryna qosady, – deıdi ol.
Sonymen qatar ulttyq sýverenıtet, zaıyrlylyq ustanymy, ǵylym-bilimge basymdyq berý – munyń bári damyǵan memleketterdiń Konstıýtsııa modelderimen mazmundas qundylyqtar
– Jalpy alǵanda, jobany tıimdi ótpeli model dep baǵalaýǵa bolady. Bul – burynǵy júıeden kilt qol úzý emes, demokratııany tereńdetýge sanaly túrde satylap kóshý, – deıdi sarapshy.
Onyń aıtýynsha, jańa Konstıtýtsııa jobasyna engizilgen bılik ınstıtýttarynyń tepe-teńdigi normasy saıası júıeniń turaqtylyǵyn qamtamasyz etedi jáne zamanaýı qoǵamnyń talaptaryna saı keledi.
Aıta keteıik buǵan deıin jańa Konstıtýtsııa jobasynda adamnyń qoǵam men memleket damýyndaǵy orny aıqyn ekenin jazǵanbyz.
