Instagram joǵalǵan sátte adam ómiri qalaı ózgeredi
Almatyda «Instagramşıtsa» fılminiń túsirilimi ótip jatyr. Sıýjet boıynsha Aınur Instagram juldyzy. Onyń mıllıon jazylýshysy bar. Boıjetken Instagram arqasynda tegin tamaq iship, tegin kıim kıip, tanymal bolyp keledi. Birde Instagram jabylyp, ol qıyn jaǵdaıda qalady.
Fılm avtorlary kúnde selfı túsirgish qyzdardyń ómirin sýrettegisi keldi.
«Internette qyzdar laık jınap, jazylýshy tartýǵa tyrysady. Qyz bolsań sheshinýiń kerek. Jigit bolsań jaqsy ázil aıtýyń kerek. Bul shynaıy ómirdiń kóp bóligin jaýlap alady. Internetsiz ómir budan da qyzyq ekenin kórsetkimiz keldi», - dedi fılmniń birlesken avtory Darhan Aqylbekuly.
Basty róldi somdaıtyn Anar Batyrhannyń ómirde de 900 myńnan asa jazylýshysy bar. Belgili Reseı pablıkteri de onyń paraqshasyn repost jasaǵan. Olardyń ishinde ánshi Bıanka da bar.
«Q-eli serıaly bastalǵanda mende múlde paraqsha bolmaǵan. 2015 jyly rólge taǵaıyndalǵan soń maǵan akkaýnt ashýǵa týra keldi. Serıaldyń ekinshi maýsymynan soń akkaýntqa kúnine 10 000 adamnan jazyla bastady»,- dedi Anar Batyrhan.
Aktrısa Júrgenov atyndaǵy Óner akademııasyn qyzyl dıplommen támamdaǵan.
«Men bıýtı bloger emespin. Krem, súrme, meık ap sýretterin qoımaımyn. Men ózimniń talantymdy kórsetýge tyrysamyn. Dombyrada, gıtarada oınaımyn. Úndi ánderin aıtamyn, obrazǵa kiremin», - dedi A.Batyrhan.
So-prodıýser, bas er adamnyń rólin oınaıtyn Qýat Sadyqovtyń Instagramda 27 myń jazylýshysy bar.
Akter Serik Shárip Instagramdaǵy ómirden sharshaǵanyn aıtty.
«2 jyl buryn Instagram jelisine fanattyqpen qaraıtynmyn. Nurlan Batyrov ekeýmiz kúlkili rolıkter túsiretinbiz. Biraq qazirgi ómirimde áleýmettik jeliden sharshaıtyn kezeń týdy. Men jelini umyta bastadym», - dedi Serik Shárip.
Onyń aıtýynsha, qazir tanymal bolý qıyn.
«Tanymal bolýdyń basty qupııasy júılelilikten aınymaý. Tek akkaýntty toqtamaı damytýdyń arqasynda jetistikke jetýge bolady»,- dedi akter.
Instagram týraly fılmdi avtorlar keler jyldyń kókteminde kópshilikke kórsetpek.