Instagram jelisinde qazaqstandyq avtorlardyń mýzykasy qaıta paıda boldy

ASTANA. KAZINFORM – Qazaqstandyq paıdalanýshylar otandyq oryndaýshylardyń mýzykasy birneshe aı boıy joǵalyp ketken soń ony Instagram jelisinde qaıtadan paıdalana alady.

Ádilet mınıstrligi Instagram jelisinde qazaqstandyq oryndaýshylardyń mýzykasynyń paıda bolýyna qatysty jaǵdaıǵa túsinik berdi.

- Iá, búginde Instagram áleýmettik jelisinde jekelegen qazaqstandyq avtorlar men oryndaýshylardyń mýzykalyq týyndylary paıda boldy. Instagram jelisindegi mýzykalyq mazmunǵa qol jetkizý Meta platformasynyń ishki saıasatyna jáne avtorlyq quqyq ıelerimen jasalǵan kelisimderge sáıkes merzimdi túrde jańartylatynyna nazarlaryńyzdy salamyz. Meta ujymdyq negizde quqyqtardy basqaratyn uıymmen ǵana emes, avtorlar men oryndaýshylarmen nemese olardyń ókilderimen tikeleı kelisim jasaýǵa quqyly. Osyǵan baılanysty bul Meta-men tikeleı kelisimge otyrǵan avtorlyq quqyq ıeleriniń shyǵarmalary dep sanaımyz, - dep habarlady vedomstvo.

Eske salaıyq, Ádilet mınıstri Erlan Sársembaev Úkimet otyrysynan keıin ótken baspasóz máslıhatynda qazaq mýzykasy qashan Meta-ǵa qaıta shyǵatyny týraly paıymyn aıtty.