Instagram nelikten hat almasýǵa arnalǵan shıfrlaýdy alyp tastap jatyr
ASTANA. KAZINFORM — Meta Instagram jelisindegi jeke habarlamalardy shıfrlaýdy toqtatady, dep habarlaıdy Euronews.
Paıdalanýshylar endi qupııalyq rejımin qosa almaıdy, al platforma habarlamalardy standartty shıfrlaý arqyly qorǵaıdy. Álem boıynsha Direct-habarlamalardy qorǵaý fýnktsııasy qoljetimsiz bolmaq. Standartty shıfrlaý kezinde platforma qajet bolsa, habarlamalardyń mazmunyna qol jetkize alady.
Shıfrlaý — tsıfrlyq kommýnıkatsııany qorǵaýdyń eń senimdi tásilderiniń biri. Munda habarlamalardy tek jiberýshi men qabyldaýshy kóre alady. Sol sııaqty júıeler WhatsApp, Signal, Facebook Messenger, iMessage jáne Google Messagesta qoldanylady. Al Telegramda tek «qupııa chattar» bar.
2019 jyly Meta barlyq habar almasý qyzmetterinde E2EE engizýdi josparlaǵanyn jarııalaǵan. Keıin ol Facebook Messengerde tolyq ıntegratsııalandy. Alaıda bul tehnologııany balalardy qorǵaý uıymdary men bılik organdary birneshe ret synaǵan, sebebi ol ınternettegi balalarǵa qatysty zorlyq-zombylyq qylmystaryn tergeýdi qıyndatýy múmkin.
Meta kompanııasynyń málimetinshe, Instagramdaǵy shıfrlaýdan bas tartýǵa paıdalanýshylar qyzyǵýshylyǵynyń azdyǵy sebep bolǵan. Sarapshylar sondaı-aq bul ózgeris habarlamalardy jasandy ıntellekt pen jarnamalyq algorıtmderdi óńdeýdi jeńildetedi dep sanaıdy. Kompanııa habarlaǵandaı, jeke habarlamalar JI modelderdi oqytýǵa paıdalanylmaıdy.
Shıfrlaýdy buryn qosqan paıdalanýshylarǵa mańyzdy habarlamalardy, fotolar men basqa medıafaıldardy aldyn ala saqtap qoıý usynylady. Tsıfrlyq qaýipsizdik mamandary E2EE qoldanysy joq platformalarda qupııa aqparat jibermeýge keńes beredi.
Eske salaıyq, kıberqylmyskerler Instagram áleýmettik jelisiniń 17,5 mıllıon qoldanýshysyna tıesili jeke derekterdi urlaǵan.
