Instagram-daǵy siltemeni basqan aqmolalyq turǵyn 5 mln teńgesinen aıyryldy

ASTANA. QazAqparat - Aqmolalyq áıel alaıaqtardyń quryǵyna túsip qaldy, – dep habarlaıdy Polisia.kz.

Internet-alaıaqtardyń áreketinen zardap shekken Aqmola oblysynyń turǵynynyń kezekti ótinishi Kókshetaý qalasynyń Polıtsııa basqarmasyna 11 qazanda kelip tústi.

Ótinish berýshiniń aıtýynsha, aǵymdaǵy jyldyń qyrkúıeginde Instagram áleýmettik jelisinde onyń nazaryn kapıtaldy kóbeıtý jáne dıvıdendter alý múmkindigi týraly habarlama aýdarǵan. Atalǵan silteme boıynsha ótip, shaǵyn saýalnamany toltyrǵan aqmolalyq turǵyn baǵdarlamaǵa tirkelgen, sol mezette onyń telefonyna bir konsýltanttan qońyraý túsken.

Kúni boıy alaıaqtar ótinish berýshini barlyq nusqaýlardy oryndaý jáne aqsha aýdarý qajet dep sendirgen. Áıelde bul alaıaqtar bolýy múmkin degen kúdik birneshe ret paıda bolǵan, alaıda adamdy sendirýdiń joǵary qabiletine ıe alaıaqtar ony sendirip, sonymen qatar gıpnozdaǵandaı bolǵan.

Osy baǵdarlamanyń zańdylyǵy týraly suraqtarǵa alaıaqtar derektemeleri bar qujattar usynǵan. Talap etilgen somany aýdarý úshin ótinish berýshi depozıttegi jınaqtardy paıdalanyp, dostarynan qaryz alǵan, sondaı-aq bankte nesıe rásimdegen. Alaıaqtarǵa aýdarylǵan jalpy soma – 5 mıllıon teńgeden astam.

Bul faktini polıtseıler QR QK-niń 190-baby 3-bóligi (Alaıaqtyq) boıynsha sotqa deıingi tergep-tekserýlerdiń biryńǵaı tiziliminde tirkedi. Alǵashqy tergeý áreketteri aıasynda hat-habarlar, qońyraýlar túsken telefon nómirleri tárkilendi.

Tergeý jalǵasýda.

Polıtseıler aqmolalyqtardy qyraǵy bolýǵa shaqyrady: ınternet-alaıaqtyqtyń negizgi túrleri – ınternet-resýrstarǵa jalǵan habarlandyrýlar berý jáne jábirlenýshilerdiń joq taýar úshin aldyn ala tólem jasaýy – 94 fakt, áleýmettik jeliler arqyly kredıtterdi rásimdeý jáne onlaın-qaryzdar. Sońǵy kezde alaıaqtar sengish azamattarǵa qońyraý shalyp, ózderin bank qyzmetkerleri etip tanystyratyn jaǵdaılar jıilep ketti.

Sondaı-aq polıtsııa qyzmetkerleri bankpen birlesken is-sharalar ótkizip, olardyń banktik operatsııalary týraly alańdaıtyn faktiler de bar. Olar bir rettik nómirlerden qońyraý shalyp, qylmystyq qýdalaý qaýpimen qorqytady.

Tártip saqshylary Aqmola oblysynyń turǵyndary men qonaqtaryna eshbir jaǵdaıda SSV-kodtar men bank kartalarynyń nómirlerin habarlamaýǵa, banktiń jalǵan ókilderiniń nusqaýy boıynsha qashyqtan qol jetkizý qosymshalaryn júktemeýge keńes beredi.