Instagram-daǵy sýretterińizdi JI paıdalanýy múmkin: Meta jańa servısti iske qosty
ASTANA.KAZINFORM — Meta kompanııasy jasandy ıntellekt kómegimen sýret jasaý jáne óńdeýge arnalǵan jańa Muse Image servısin tanystyrdy, dep 24kg jazdy.
Jańa servıs mátindik sıpattama negizinde keskinder jasap, daıyn fotosýretterdi óńdeýge múmkindik beredi. Onyń basty múmkindikteriniń biri — Instagram-daǵy ashyq akkaýnttarda jarııalanǵan fotosýretterdi jańa JI-keskinderdi jasaý kezinde paıdalaný.
Sheteldik tehnologııalyq basylymdardyń habarlaýynsha, paıdalanýshy Meta AI-ǵa suranys engizý kezinde qajetti Instagram-profıldi kórsetýi jetkilikti. Osydan keıin jasandy ıntellekt sol akkaýnttaǵy kópshilikke qoljetimdi fotosýretterdi, sonyń ishinde adamnyń beınesin de paıdalanyp, jańa sýretterdi generatsııalaı alady.
Sonymen qatar, akkaýnt ıesine onyń fotosýretteri jasandy ıntellekt arqyly paıdalanylǵany týraly eshqandaı habarlama jiberilmeıdi. Kompanııanyń málimetinshe, mundaı múmkindikke qarsy paıdalanýshylar ony qupııalylyq (privacy) baptaýlary arqyly óshire alady.
Meta ókilderiniń aıtýynsha, Muse Image kompanııa erejelerin buzatyn keskinderdiń jasalýyna jol bermeıtin qorǵanys tetikterimen jabdyqtalǵan. Degenmen, jańa fýnktsııa jeke derekterdiń qorǵalýy men paıdalanýshylar jarııalaǵan kontentti qoldaný máselesine qatysty túrli suraqtar týyndatyp otyr.
Aıta keteıik, buǵan deıin Meta Instagram, Facebook jáne WhatsApp-ta aqyly fýnktsııalardy iske qosqan bolatyn.
