Instagram-daǵy storısti «jasyryn qaraý» fýnktsııasy qandaı qaýip tóndiredi – sarapshy pikiri
ASTANA. KAZINFORM – Meta kompanııasy Instagram, Facebook jáne WhatsApp servısterine arnalǵan aqyly jazylymdardy kezeń-kezeńimen synaqtan ótkizip jatyr. Jańa múmkindikterdiń ishinde Instagram Stories jarııalanymdaryn «jasyryn qaraý» fýnktsııasy erekshe nazar aýdartty.
Jańa Plus jazylymdary paıdalanýshylarǵa keńeıtilgen analıtıka, ınterfeısti jekeleı baptaý jáne aýdıtorııany basqarýdyń qosymsha quraldaryn usynady. Sonyń ishinde storısti qaraǵan adamnyń aty-jónin kórsetpeı kórýge múmkindik beretin fýnktsııa engizilýde.
Bul múmkindik arqyly paıdalanýshy storısti kórgenimen, jarııalanym avtory ony kórermender tiziminen baıqamaıdy. Alaıda sarapshylar mundaı fýnktsııany tolyq anonımdik dep qabyldamaýǵa shaqyrady.
QazTech alıansy aqparattyq qaýipsizdik komıtetiniń teń tóraǵasy Evgenıı Pıtolınniń aıtýynsha, paıdalanýshy basqa adamdar úshin kórinbegenimen, platformanyń ózi onyń barlyq áreketin tirkep otyrady.
– Aqparattyq qaýipsizdik turǵysynan bul anonımdik emes. Bul tek paıdalanýshynyń qaralymdar tiziminde qalaı kórinetinin ózgertedi. Al platformanyń ózi júıe ishindegi barlyq áreketti tirkeýdi jalǵastyra beredi, – dedi sarapshy.
Onyń aıtýynsha, Meta burynǵydaı paıdalanýshynyń IP-mekenjaıyn, qurylǵy túrin, belsendilik ýaqytyn, kontentti qaraý uzaqtyǵyn jáne basqa da minez-qulyq derekterin jınaıdy. Bul aqparat usynym algorıtmderi men kontentti jekeleý maqsatynda paıdalanylady.
Sarapshy mundaı fýnktsııalar paıdalanýshylarda jalǵan qaýipsizdik sezimin qalyptastyrýy múmkin ekenin atap ótti.
– Paıdalanýshy ózin kórinbeıtindeı sezinedi. Biraq júıe deńgeıinde onyń barlyq áreketi tolyq tirkelip otyrady. Bul – qupııalyqtyń ıllıýzııasy ǵana, – dedi Evgenıı Pıtolın.
Mamandardyń pikirinshe, storısti jasyryn qaraý múmkindigi áleýmettik jelidegi minez-qulyqqa da áser etýi múmkin. Bir jaǵynan, paıdalanýshylar kontentti jarııa túrde belgi qaldyrmaı qaraı alady. Ekinshi jaǵynan, bul basqa adamdardyń belsendiligin olardyń habarynsyz baqylaýǵa jaǵdaı jasaıdy.
Sarapshylar mundaı fýnktsııalar kıberbýllıng, jasyryn baqylaý jáne daýly jaǵdaılarda tsıfrlyq izderdi anyqtaý máselelerin kúrdelendirýi yqtımal ekenin aıtady.
Sonymen qatar Qazaqstanda mundaı tetikter jeke derekterdi qorǵaý jáne olardy óńdeýdiń ashyqtyǵy jónindegi talaptar turǵysynan da mańyzdy sanalady. Bul máseleler «Derbes derekter jáne olardy qorǵaý týraly» zańmen retteledi.
Aıta keteıik, Meta buǵan deıin Instagram men Facebook jelilerinde 13 jasqa tolmaǵan paıdalanýshylardy anyqtap, olardyń akkaýnttaryn joıýǵa arnalǵan jasandy ıntellekt júıesin iske qosatynyn habarlaǵan. Sondaı-aq WhatsApp messendjerinde JI-kómekshimen sóılesýge arnalǵan «ınkognıto rejımi» engizildi.
