Instagram-daǵy bir jarnama erli-zaıyptyny 10 mln teńgesinen aıyrdy
ASTANA. KAZINFORM — Soltústik Qazaqstan oblysynda erli-zaıypty ınternet-alaıaqtarǵa aldanyp, 10 mln teńgesinen aıyryldy, dep habarlaıdy Polisia.kz.
SQO aýdandarynyń birinde aýyldyq jerde turatyn erli-zaıypty ınternet-alaıaqtardyń «ınvestıtsııa» shemasyna aldanyp, 10 mıllıon teńgesinen qaǵylǵan.
60 jastaǵy aýyl turǵynynyń Instagram jelisinen 1991 jylǵa deıin týǵan azamattardyń barlyǵyna belgili bir bank tólem jasaıtyny týraly jarnamany kórýinen bastalǵan. Áıel ótinim berip, aty-jóni men telefon nómirin kórsetken. Kóp uzamaı oǵan ózin «Goldmans Group» brokerlik kompanııasynyń mamany retinde tanystyrǵan adam qońyraý shalǵan.
Aıta keteıik, dál osyndaı ataýdy nan-toqash ónimderin shyǵaratyn naqty kásiporyn da paıdalanady. Alaıaq áıelge ınvestıtsııa arqyly tabys tabýdy usynǵan. Onyń nusqaýyn oryndaǵan aýyl turǵyny «saýda shotyn» ashyp, bank servısi arqyly bólip tóleýge alǵan 100 dollardy sol shotqa aýdarǵan. Keıin shamamen bir aı boıy onymen ózin «analıtık» dep tanystyrǵan áıel baılanysta bolyp, «ınvestıtsııa» jasaý boıynsha «keńes» berip otyrǵan. Aýyl turǵyny bul shemaǵa kúıeýin de qatysýǵa kóndirgen. Olar barlyq jınaǵan qarajatyn jumsap, ártúrli bankterden nesıe alǵan. Keıin ǵana kıberalaıaqtardyń qurbany bolǵandaryn túsingen.
— Keltirilgen shyǵyn kólemi 10 mıllıon teńgeni qurady. Osy derek boıynsha polıtseıler alaıaqtyq shemaǵa dropper retinde qatysqan birqatar adamdy anyqtady. Tártip saqshylary túsindirý jumystaryn júrgizgennen keıin jábirlenýshiler dropperlerden keltirilgen shyǵyndy óndirý týraly azamattyq sotqa talap aryz bergen, — deıdi tártip saqshylary.
Polıtseılerdiń aıtýynsha, «ınvestıtsııa» arqyly aldaý shemasy eń kóp taralǵan tásilderdiń biri emes. Jyl basynan beri SQO-da mundaı alaıaqtyqtyń 16 deregi tirkelgen. Alaıda mundaı qylmystar kóp jaǵdaıda asa iri mólsherdegi shyǵynǵa ákeledi. Internet arqyly tabys tabýdy josparlamas buryn, bul máseleni muqııat zerttegen jón.
Budan buryn Aqtóbede páter almaq bolǵan 59 adam alaıaqtarǵa aldanyp qalǵanyn jazǵanbyz.
