Instagram ata-analarǵa balasynyń sýıtsıdke qyzyǵýshylyq tanytqany týraly eskertý jiberedi
ASTANA. KAZINFORM — Beısenbi kúni Meta kompanııasy Instagram 16 jasqa tolmaǵan jasóspirim sýıtsıd nemese óz-ózine zııan keltirý taqyrybyndaǵy beınelerdi jıi izdegen jaǵdaıda ata-analarǵa eskertý jiberetinin málimdedi. Bul týraly AZERTADJ habarlady.
Ata-analar Instagram-daǵy ata-analyq baqylaý fýnktsııasyn paıdalanǵan kezde tıisti habarlama ala alady.
Kompanııa bul múmkindik jasóspirimderdi yqtımal zııandy kontentten qorǵaýǵa baǵyttalǵan qoldanystaǵy sharalardy tolyqtyratynyn atap ótti.
NU.nl gazetiniń málimetinshe, platforma sýıtsıdti nemese óz-ózine zııan keltirýdi nasıhattaıtyn kontentke qatysty qatań saıasat ustanatynyn málimdegen.
Qazirgi ýaqytta Instagram mundaı izdeý suraýlaryn buǵattap, paıdalanýshylardy kómek kórsetý resýrstaryna baǵyttaıdy.
Kelesi aptadan bastap bul eskertý fýnktsııasy AQSh, Ulybrıtanııa, Aýstralııa jáne Kanada turǵyndary úshin qoljetimdi bolady. Keıinirek Eýropa elderi de qosylady.
Sonymen qatar, úkimetterge 16 jasqa tolmaǵandardyń áleýmettik jelilerdi paıdalanýyna «aýstralııalyq tyıym» engizý týraly qysym kúsheıip keledi.
Frantsııa, Danııa jáne Ulybrıtanııa syndy elder jastardyń áleýmettik jelilerdi paıdalanýyn shekteý josparlaryn ázirlep jatyr.
Buǵan deıin hakerler Instagram-nyń 17,5 mıllıon qoldanýshysynyń derekterin urlaǵanyn jazǵanbyz.