Inspektorlar Qazaqstan naryǵynda balalarǵa qaýipti oıynshyqtardy anyqtady
ASTANA. 11 sáýir. QazAqparat - QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń ınspektorlary bıylǵy jyldyń birinshi toqsanynda Qazaqstan naryǵynda balalarǵa qaýipti oıynshyqtardy anyqtady.
Atalǵan komıtettiń tóraǵasy Ryskeldi Sátbaevtyń aıtýynsha, órenderdiń oıynshyqtaryn satýmen aınalysatyn jalpy 17 saýda oryndary tekserilip, onyń ishinde 10-y boıynsha zań buzyshylyqtar anyqtaldy. 779 050 teńge kóleminde ákimshilik aıyppul salyndy. 10 451 389 teńge somasyndaǵy oıynshyqtardyń 108 partııasyn satýǵa tyıym salyndy.
Máselen, Qaraǵandydaǵy iri saýda oryndarynyń birinde jeke kásipker tigisteri durys bekitilmegen qytaılyq oıynshyqtar men jaǵymsyz ıisi bar qýyrshaqtardy saýdaǵa qoıǵan eken. Bul bıznesmenniń keıbir oıynshyqtary tańbalanbaǵan, sondaı-aq tutynýshylar úshin memlekettik tilde aqparattar da tolyq kórsetilmegen. Buǵan qosa, kásipker sáıkestik sertıfıkatyn da usynbaǵan eken.
«Tekseris qorytyndysy boıynsha jeke kásipker ákimshilik jaýapqa tartylyp, 81 myń teńgeniń oıynshyqtarynyń 10 partııasyn saýdalaýǵa tyıym salyndy»,-dep tolyqtyrdy R. Sátbaev.
Sonymen qatar komıtet basshysy elimizdiń birqatar óńirindegi osy tektes faktiler oryn alǵanyn atap ótti.
