Inspektorlar elimizge ákelingen 560 tonna jemiske shekteý qoıdy

NUR-SULTAN. QazAqparat – QR Aýyl sharýashylyǵy mınıstrligi ósimdikter karantıni jónindegi memlekettik ınspektorlary 17-24 aqpan aralyǵynda Reseı Federatsııasy men Iran Islam Respýblıkasynan elimizge 560 tonna fıtosanıtarlyq qaýiptiligi joǵary ósimdik ónimderin zańsyz alyp kirýdiń 26 faktisin anyqtady, dep habarlaıdy QazAqparat QR AShM baspasóz qyzmetine silteme jasap.

«Reseıden fıtosanıtarlyq sertıfıkatsyz Qazaqstanǵa 54 tonna sábiz, 10 tonna qyryqqabat, 40 tonna kartop jáne qyzylsha, 20 tonna bıdaı, 19,5 tonna jemis, sondaı-aq 2 myń gúl jáne Irannan el naryǵyna fıtosanıtarlyq sertıfıkaty joq 174 tonna alma jáne 249 tonna keptirilgen jemis kirgizilmek bolǵan», delingen habarlamada.

Ósimdikter karantıni salasyndaǵy zań talaptaryna sáıkes atalǵan ónimder Qazaqstan aýmaǵyna tasymaldaýǵa tyıym salynǵan. Kináli tulǵalar QR Ákimshilik quqyq buzýshylyq týraly kodeksiniń 400-baby boıynsha ákimshilik jaýapkershilikke tartyldy.

«Buǵan deıin AShM memlekettik ınspektorlary Reseı Federatsııasynan mango ónimderi men AQSh-tan mındal jańǵaǵyn Qazaqstanǵa kirgizbegenin aıta ketý kerek.

Atap aıtqanda, Reseıden Qazaqstanǵa fıtosanıtarlyq sertıfıkatsyz 2 tonna kúnjit tuqymy, 20 tonnadan astam grek jańǵaǵy, qurma jáne keptirilgen mango, 39 tonna kartop, 67 tonna kúnbaǵys jáne 58,5 tekshe metr kesilgen aǵash kirgizilmek bolǵan», delingen habarlamada.

Sondaı-aq, jaramsyz fıtosanıtarlyq sertıfıkatpen 2,3 myń tonna arpa alyp kelý faktisi anyqtalǵan.

Júktiń qaýipsizdigin rastaıtyn fıtosanıtarlyq sertıfıkatsyz respýblıkanyń memleket shekarasyna Vetnamnan 23,4 tonna kofe dáni jáne AQSh-tan 86,6 tonna mındal jańǵaǵy alyp kelingen.

Ósimdikter karantıni salasyndaǵy zańnama talaptaryna sáıkes atalǵan ónimderdi Qazaqstan Respýblıkasynyń aýmaǵyna kirgizýge tyıym salynǵan, aıypty tulǵalar ákimshilik jaýapkershilikke tartyldy.

Sonymen qatar, QR AShM memlekettik ınspektorlary el aýmaǵyna qaptama tańbasy joq Ózbekstannan kelgen 23 tonnadan astam jemis, onyń ishinde 6 tonna anar jáne 30 tonna sábizdiń kirýine tyıym saldy.