Inspektorlar brakonerlerge oq atýǵa nege qorqady
«Men ózim olarǵa ylǵı aıtamyn, qoryqpańdar, qarýdy qoldana berińder. Atyńdar, kóliktiń balonynan atyńdar, toqtatyńdar. Biraq bizdiń ınspektorlar qarýdy qoldanýǵa qorqady. Qylmystyq jaýapkershilikke iligip ketemiz dep alańdaıdy. Sebebi zańda ony «ınspektor tek qarýly shabýyl bolǵan kezde ǵana qoldana alady» dep jazylǵan. Negizi, «qarýly» degen sózdi alyp tastaý qajet. Órkenıetti elderdiń bárinde solaı. «Shabýyl» degendi ǵana qaldyrý qajet. Sonda ınspektorlar janýar álemin de, ózderin de qorǵaı alady», - dedi E.Álzaqov Parlament Májilisinde ótken dóńgelek ústel otyrysynda.
Osy oraıda mekeme basshysy ınspektorlardyń qylmystyq jazaǵa iligý faktilerin de keltirdi. Ótken jyly Ońtústik Qazaqstanda bir ınspektor brakonerlerge qarsy qarýdy qoldanǵan.
«Sonda oqtyń bir bytyrasy brakonerdiń arqasyna tıgen. Sol kezde biz ashyq aıttyq, ınspektordyń qarýdy qoldanǵany durys boldy. Ol bárin zań boıynsha istedi. Al Іshki ister mınıstrligi aldymen buzaqylyq boıynsha is qozǵady. Masqara ǵoı. Adam qyzmettik babymen qarýdy qoldanyp otyr. Quqyq qorǵaýshylar bolsa, oǵan «buzaqy» degen aıdar taǵyp otyr. Biz qarsy shaǵym túsirdik. Biraq quqyq qorǵaýshylar adam ómirine qastandyq jasaý boıynsha kiná taqty. Oǵan da qarsy shaǵym túsirdik. Aqyr sońynda qyzmettik babyn asyra paıdalandy dep, 5 jylǵa bas bostandyǵyn shektedi. Qamaýǵa aldy. Rýslan Zagırov degen jas jigit. Temeki shekpeıdi. Qazaqstannyń regbı boıynsha qurama komandasynyń múshesi. Ózi sportshy. Otbasy bar. Obal ǵoı. Qamaýǵa aldy. Sonda ádildik qaıda? Inspektorlardyń bári osy isti jiti baqylap otyrdy», - dep atap kórsetti E.Álzaqov.
Aıta keteıik, búgin QR Aýyl sharýashylyǵy mınıstrligi brakonerlermen kúres salasyndaǵy zań buzýshylyqtardy jarııalady. Qylmyskerlerge quqyq qorǵaýshylar ǵana emes, saraptama jasaıtyn mamandar da kómektesip jatady.
Orman sharýashylyǵy jáne janýarlar dúnıesi komıtetiniń tóraǵasy Qaıyr Ryskeldınovtyń aıtýynsha, saraptama jasaý kezinde kıik nemese arqar sııaqty sırek kezedesetin janýarlardyń etin qoı eti dep kórsetý faktileri az emes. Al tárkilengen ólikterdiń sany ádeıi azaıtyp jazylady. «Búginde osy salada saraptama jasaıtyn mekemeler kóp. Arnaıy kýálikti alady da, saraptama jasaı beredi. Máselen, osydan úsh jyl buryn «Oxotzooprom»-nyń ınspektorlary N.Sh.Kishkentaev degen azamaty ustady. Onyń kóligin tekserý kezinde terisi sypyrylǵan arqardyń ushasy tabyldy. Atalǵan fakt boıynsha Qaraǵandy oblysy Aqtoǵaı aýdanynyń ishki ister bólimi qylmystyq is qozǵady. Al saraptama qorytyndysynda arqardyń ushasy «úı janýary» bolyp shyqty. Ol saraptamany jeke kásipker S.Z.Kópbaev ótkizdi. Onyń jazyp bergen qorytyndysy negizinde qylmystyq is toqtatyldy», - deıdi Q.Ryskeldınov.