Inspektorlar Astana áýejaıynan qaýipti gúl trıpsin anyqtap, onyń kózin joıdy
«Astana Halyqaralyq Áýejaıy» fıtosanıtarııalyq baqylaý beketinde karantındik tekserý barysynda salat japyraqtary men qara búldirgennen nusqalar alynyp, respýblıkalyq karantındik zerthanaǵa jiberilgen. Saraptama nátıjesi boıynsha 85 keli salat japyraqtary men 21 keli ımporttalǵan qara búldirgende gúldi trıpsi anyqtaldy. Qaýipti zııankespen zalaldanǵan ónim keden qyzmetkerleri men ekologııa mamandarynyń, sondaı-aq júk ıesiniń kózinshe órteldi», delingen baspasóz baıanynda. Toqtala ketetin jaıt, 2014 jyly Nıderlandydan ákelingen ónimderden atalǵan zııankes 6 márte anyqtalǵan, onyń 3-ýi jańa kesilgen gúlderde bolypty. Mamandardyń sózine qaraǵanda, qazirgi tańda elimizdiń jylyjaılarynda gúl trıpsi joq. Sondyqtan, gúl trıpsin ákelý jáne onyń taralýy respýblıkanyń jylyjaılaryndaǵy gúl men kókónis ónimderine juqtyrý qaýpin týdyryp, ondaı ónimder tolyqtaı joıýyn qajet etýi múmkin. Málimetterge súıensek, jalpy respýblıka boıynsha ótken jyly karantındik obektilermen zalaldanǵan 12 fakt anyqtalsa, sonyń 8-i batys gúl trıpsine qatysty bolǵan. Sonyń saldarynan 3 tonnaǵa jýyq qaýipti júk joıylǵan. Osy jyldyń ózinde aýyl sharýashylyǵy mınıstrligi karantındik beketterimen 2,5 tonna juqtyrylǵan gúl men kókónisterdi anyqtap, joıdy. Aıta keteıik, qazirgi tańda batys (Frankliniella occidentalis) gúl trıpsi jabyq jerde ósiriletin gúldi, dekoratıvti, kókónis daqyldarynyń asa qaýipti zııankesi bolyp tabylady.