Innovatsııalyq jobalarǵa ınvestıtsııa salýǵa yntalandyratyn tetikter bolýy kerek – Oljas Bektenov
ASTANA. KAZINFORM – Innovatsııalyq jobalarǵa ınvestıtsııa salýǵa yntalandyratyn tetikter bolýy kerek. Bul týraly Premer-mınıstr Oljas Bektenov aıtty.
Búgin ınnovatsııalardy damytý máselesi talqylanǵan Úkimet otyrysynda Oljas Bektenov Ǵylym jáne joǵary bilim mınıstri Saıasat Nurbekten: «Innovatsııalyq jobalardy iske asyrý úshin ınvestıtsııa kerek. Ol túsinikti. Innovatsııalyq jobalar tez arada, qysqa merzimde nátıje bere bermeıdi. Sondyqtan uzaqmerzimdi ınvestıtsııa qajet. Ony qalaı tartamyz, tetikteri bar ma?» - dep suraǵan edi.
Saýalǵa jaýap bergen mınıstr qazirgi tańda ınnovatsııalarǵa ınvestıtsııa tartýǵa múmkindik beretin, naqty zańnamalyq turǵyda bekitilgen tetikter qalyptasyp jatqanyn aıtty.
- Birinshiden, qazir qabyldanyp jatqan ózgertýlerde ǵylymı-tájirıbelik arnaıy granttar kózdelgen. Kommertsııalandyrýǵa jetkizý úshin TRL 4–6 uzaqmerzimdi qural bolady. Ekinshiden, endaýment-qorlar týraly arnaıy zań qabyldandy. Sol zań aıasynda jyl basynda alǵashqy endaýment-qor tirkeldi. Tek bir kompanııadan 10 mlrd teńgege deıin mindettemeler jınadyq. Bul - uzaqmerzimdi qural. Ár joǵary oqý ornynyń, ǵylymı-zertteý ınstıtýtynyń janynda osyndaı ǵylymı endaýment-qorlar qurylady. Úshinshiden, eń úlken úmitimiz – Bıýdjet, Salyq kodeksterine engizilgen arnaıy «sýper» shegerimder. Salyqtyq jeńildikter 300 paıyzǵa deıin jetedi. Jańa tetik bıyldan bastap júıeli jumys istegen kezde ǵylymı jobalarǵa uzaqmerzimdi qosymsha qarjy tartylady, - dedi Saıasat Nurbek.
Onyń aıtýynsha, Májiliste ǵylymı qalashyqtar, ǵylymdy qajet etetin aýqymdy aýmaqtar týraly zań birinshi oqylymda maquldandy.
- Bul ár óńirde ǵylymı parkter qurýǵa jáne bıznes pen ǵylymı uıymdardy bir orynǵa shoǵyrlandyrýǵa, uzaqmerzimdi ınnovatsııalyq ónimderdi shyǵarýǵa múmkindik beredi, - dedi mınıstr.
Osy rette Premer-mınıstr ınvestıtsııalardy yntalandyrý qajettigin basa atap ótti.
- Óıtkeni, ınnovatsııalyq jobalarǵa qomaqty qarjy salamyn dep júrgen bıznesmender kóp dep aıta almaımyz. Ol tek bizde ǵana emes, basqa da memleketterde solaı. Sondyqtan yntalandyrý tetikteri bolýy kerek, - dedi Oljas Bektenov.
Buǵan deıin Úkimet otyrysynda ınnovatsııalardy damytý máselesi talqylanatynyn jazǵan edik.
