Innovatsııalyq sheshimderdi qoldanatyn kompanııalar sany 3,5 ese ósti – Oljas Bektenov
ASTANA. KAZINFORM - Qazaqstan Respýblıkasynyń Premer-mınıstri Oljas Bektenov Mınskide «INNOPROM.Belarýs» halyqaralyq ónerkásip kórmesin aralap, «Jańa tehnologııalar odaǵy: bolashaq ónerkásipti qurý» taqyrybyndaǵy plenarlyq sessııada sóz sóıledi, dep habarlaıdy Úkimettiń baspasóz qyzmeti.
Oljas Bektenov óz sózinde Memleket basshysynyń strategııalyq kózqarasy ınnovatsııalyq jáne tsıfrlyq ekonomıkany qalyptastyrýǵa baǵyttalǵanyn atap ótti.
Sondaı-aq sessııaǵa Belarýs Respýblıkasynyń Premer-mınıstri Aleksandr Týrchın, Reseı Federatsııasy Úkimetiniń tóraǵasy Mıhaıl Mıshýstın, Ázerbaıjan Respýblıkasynyń Premer-mınıstri Álı Asadov, Qyrǵyzstan Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev, Tájikstan Premer-mınıstri – TMD uıymyna múshe elderdiń úkimetteri basshylary keńesiniń tóraǵasy Kohır Rasýlzoda, Ózbekstan Respýblıkasynyń Premer-mınıstri Abdýlla Arıpov jáne Iran Islam Respýblıkasynyń ónerkásip, shahta jáne saýda mınıstri Atabek Seıed Mohammad qatysty.
- Jahandyq ahýaldyń órbý turǵysynan alǵanda jańa tehnologııalar salalardyń básekege qabilettiligin arttyrýǵa jáne azamattarymyzdyń ómir súrý sapasyna oń áser etedi. Qazaqstan Prezıdentiniń bul máselege basa kóńil bóletini de sondyqtan. Biz derekterdi óńdeý ortalyqtaryn, senimdi baılanys arnalaryn jáne zamanaýı tehnoparkterdi qamtıtyn tsıfrlyq arhıtektýrany qalyptastyryp jatyrmyz. Ozyq tehnologııalardy keń aýqymda paıdalaný maqsatynda Úkimet janynda Tsıfrlyq shtab jumys istep tur, - dep atap ótti Premer-mınıstr.
Óńdeý ónerkásibi – búginde tsıfrlandyrý qarqyndy damyp kele jatqan salanyń biri. Sońǵy jyldarda ınnovatsııalyq sheshimderdi qoldanatyn kompanııalardyń sany 3,5 ese ósip otyr. Bul óndiris tásilin ózgertip, kooperatsııaǵa múmkindikter ashady, sonysymen kásiporyndardy tıimdiligi joǵary deńgeıige shyǵarady.
Taý-ken metallýrgııa kesheninde pılotsyz tehnologııalar, jerasty radıobaılanys júıeleri, jumys protsesterin dıspetcherleý jáne robottandyrý engizilýde. Qazaqstannyń kóptegen iri kásiporyndary osy ýaqytqa deıin karerler men drondardyń jáne ónerkásiptik robottardyń 3D-modelderin paıdalana otyryp, kendi usaqtaýdan kontsentrat shyǵarýǵa deıingi óndiristik tsıkldi tolyq tsıfrlandyryp tastady.
Osyǵan uqsas dınamıka ózge sektorlardan da baıqalyp otyr. Munaı-gaz salasynda tsıfrly sheshimder óndirý men óńdeýden bastap túpki tutynýshyǵa otyn jetkizýge deıingi óndiristiń barlyq kezeńinde qoldanylady. OilTrack platformasy munaı ónimderiniń ár kezeńdegi qozǵalysyn baqylaıdy, «Tsıfrlyq kelisimshart» qosymshasy ken oryndaryn paıdalanýdy avtomattandyrady, al «Munaı men JJM-ny tsıfrlyq tásilmen taratý» qoldanbasy naqty ýaqyt rejıminde ashyqtyq pen baqylaýdy qamtamasyz etedi.
Mashına jasaýda shtattan tys jaǵdaılarǵa jedel den qoıý ortalyqtary quryldy, sapany baqylaý úshin kompıýterlik kórý sheshimderi jáne tsıfrlyq «egizder» engizilýde.
Tehnologııalyq progresti jedeldetý úshin Qazaqstan jasandy ıntellekt ınfraqurylymyn damytýda. Memleket basshysynyń bastamasy boıynsha Ortalyq Azııadaǵy alǵashqy sýperkompıýterlik klaster iske qosyldy, ol JI-di tek memlekettik sektorda ǵana emes, sonymen qatar ǵylymı zertteýler men otandyq startaptardy damytýda da qoldanýǵa múmkindik beredi. Sonymen qatar kásiporyndarda jasandy ıntellekt sheshimderiniń salalyq akseleratorlary, demonstratsııalyq alańdar men pılottyq aımaqtar qurylady.
Tehnologııalardy ázirleýmen qatar olardy odan ári keńinen taratý úshin orta daıyndaý boıynsha sharalar qabyldanýda. Innovatsııalyq ekojúıeniń mańyzdy býyny Almaty oblysyndaǵy jańa qala – Alatau City bolmaq. Bul tehnologııalyq progress pen jaıly ómir súrý ortasyn biriktiretin iskerlik belsendilik pen ınnovatsııanyń ortalyǵy bolady.
Kadrlyq áleýetti damytýǵa erekshe kóńil bólinýde. Jumysshy mamandyqtary jyly eńbek adamynyń mártebesin kóterýge ǵana emes, sonymen qatar naryqtaǵy jańa tehnologııalarǵa sáıkes mamandardyń daǵdylaryn jetildirýge basa nazar aýdarylady.
Osyǵan deıin elimizdiń TMD memleketterimen jalpy taýar aınalymy $37,3 mlrd-ty quraǵany týraly jazdyq.