Innovatsııalyq qyzmet salasyna memlekettik qoldaý jetildiriledi – Májilis

ASTANA. KAZINFORM – Búgin Májilis Qazaqstan Respýblıkasynyń keıbir zańnamalyq aktilerine ınnovatsııalyq qyzmet salasyn memlekettik qoldaý júıesin jetildirý máseleleri boıynsha ózgerister men tolyqtyrýlar engizý týraly zańdy ekinshi oqylymda qabyldady.

«Qazaqstan Respýblıkasynyń keıbir zańnamalyq aktilerine ınnovatsııalyq qyzmet salasyn memlekettik qoldaý júıesin jetildirý máseleleri boıynsha ózgerister men tolyqtyrýlar engizý týraly» zań jobasy biryńǵaı ınnovatsııalyq klaster qurý jáne oǵan qatysýshylar úshin qoldaýdy keńeıtý arqyly ınnovatsııalyq qyzmetke jaǵdaılardy jaqsartý maqsatynda ázirlendi, - dedi Májilis depýtaty, ekonomıkalyq reforma jáne óńirlik damý komıtetiniń múshesi Aıtýar Qoshmambetov. 

Atalǵan zań jobasy bıyl 2 sáýirde Májilistiń birinshi oqylymynda maquldandy. 

Zań jobasy: 

1) «Innovatsııalyq tehnologııalar parki» klasterlik qoryn jáne «Astana Hab» halyqaralyq tehnoparkin biriktirýge jáne onyń qatysýshylary úshin biryńǵaı quqyqtyq alań qurýǵa; 

2) «Ulttyq ınnovatsııalyq júıeniń» biryńǵaı terezesi arqyly ınnovatsııalyq qyzmetti memlekettik qoldaý sharalaryn kórsetý rásimderiniń ashyqtyǵyn arttyrýǵa;
3) venchýrlik qorlardy qarjylandyrý kezinde konkýrstyq irikteýdi jáne tıimdilikti baǵalaýdy qamtamasyz etýge baǵyttalǵan.

- Kásipkerlik kodekstiń qoldanystaǵy normalaryna sáıkes tıimdilikti baǵalaýdy ınnovatsııalyq damý salasyndaǵy memlekettik organdar, jergilikti atqarýshy organdar, ulttyq damý ınstıtýty jáne memlekettik qoldaý sharalaryn iske asyrýǵa ýákiletti ózge de zańdy tulǵalar júzege asyrady. Zań jobasy 10 zańnamalyq aktige (2 kodeks jáne 8 zań) ózgerister men tolyqtyrýlar engizýdi kózdeıdi. Parlament Májilisiniń barlyq komıteti zań jobasy boıynsha oń qorytyndylaryn berdi, - dep tolyqtyrdy halyq qalaýlysy. 

Buǵan deıin Májilis Qazaqstan men Túrikmenstan arasyndaǵy ınvestıtsııa týraly qujatty qabyldandy.