Innovatsııalardy damytý tujyrymdamasy qabyldanady – Saıasat Nurbek
ASTANA. KAZINFORM – Innovatsııalardy damytý boıynsha jaýapkershilik ortalyq jáne óńirlik memlekettik organdarǵa bekitiledi. Bul týraly Úkimet otyrysynda Ǵylym jáne joǵary bilim mınıstri Saıasat Nurbek aıtty.
- Qazaqstanda ınnovatsııalardy odan ári damytý úshin qajet dep sanaıtyn birqatar praktıkalyq sharalar bar. Birinshiden – biryńǵaı úılestirýshi tetik retinde Innovatsııalyq shtab qalyptastyrý. Ekinshiden – Innovatsııalardy damytý tujyrymdamasyn ázirleý. Ol osy saladaǵy memlekettik saıasattyń biryńǵaı strategııalyq kózqarasyn aıqyndap, uzaq merzimdi basymdyqtaryn bekitedi. Úshinshiden – ınnovatsııalardy damytý boıynsha jaýapkershilikti ortalyq jáne óńirlik memlekettik organdarǵa bekitý. Tórtinshiden – 2026-2030 jyldarǵa arnalǵan ınnovatsııalardy damytý boıynsha salalyq mınıstrlikter men jergilikti atqarýshy organdardyń KPI kórsetkishterin ulttyq jáne óńirlik deńgeılerde naqty ındıkatorlar júıesimen bekitý. Besinshiden – ınnovatsııalyq qyzmetti qoldaý quraldaryn qarjylandyrýdy ulǵaıtý máselesin pysyqtaý, - dedi Saıasat Nurbek.
Onyń atap ótýinshe, Memleket basshysynyń tapsyrmasyna sáıkes, ǵylymı jáne ınnovatsııalyq saıasattyń tıimdiligin arttyrýǵa baǵyttalǵan júıeli sharalardy iske asyrý qamtamasyz etiledi. Jaqyn kezeńde ınnovatsııalyq belsendilikti yntalandyrýdyń basymdyqtary men tetikterin aıqyndaıtyn Innovatsııalardy damytý tujyrymdamasy qabyldanady.
- Sonymen qatar ǵylymdy damytý modelin qaıta qaraý boıynsha jumys júrgizilip, ony ekonomıkanyń qoldanbaly mindetterin sheshýge jáne ǵylymı zertteýlerdiń praktıkalyq qaıtarymyn arttyrýǵa qaıta baǵdarlaý kózdelýde. Ǵylymı ázirlemelerdi engizýdi qamtamasyz etý úshin joǵary oqý oryndary, ǵylymı-zertteý ınstıtýttary jáne ekonomıkanyń naqty sektory arasyndaǵy turaqty ózara is-qımyl jolǵa qoıylady. Ǵylymdy qoldaý quraldarynyń tıimdiligin arttyrý maqsatynda Ǵylym qory qyzmetin kommertsııalandyrýǵa jáne jobalardy túpki nátıjege deıin jetkizýge qaıta baǵdarlaý boıynsha jumys bastaldy. Sondaı-aq ǵylymı salany basqarý tetikterin qaıta baptaý boıynsha jumys qolǵa alyndy. Bul qabyldanatyn sheshimderdiń ashyqtyǵyn, basqarylýyn jáne nátıjeliligin arttyrýǵa múmkindik beredi, - dedi mınıstr.
Buǵan deıin Úkimet otyrysynda ınnovatsıchlardy damytý máselesi talqylanatynyn jazǵan edik.
