Innovatsııalyq tehnologııalar parki jańa ıdeıalardy júzege asyrýdyń naqty alańy bola alady - Almaty ákimi
Qala ákimi Ahmetjan Esimov búgin Almatydaǵy ІІІ Innnovatsııalyq konvent aıasynda ótip jatqan halyqaralyq ınnovatsııalyq forýmda osyndaı pikir bildirdi.
«Damyǵan elderde ýnıversıtetter óz qyzmetine ónerkásiptik zertteý men kásipkerlik qurylymdardy tartý arqyly iri ınnovatsııalyq ǵylymı-zertteý ortalyqtaryna aınalýda. Máselen Oksford ýnıversıtetiniń 300-den astam ǵylymı sıymdy kásiporyndarmen baılanysty kesheniniń jyldyq kirisi 5 mıllıard dollardy quraıdy. Massachýsetsk tehnologııalyq ýnıversıtetiniń bıýdjeti 1,8 mıllıard dollar. Onyń bıznes qurylymyna 4 myńǵa jýyq shaǵyn ǵylymı sıymdy kásiporyndar kiredi. Olardyń jıyntyq kirisi 480 mıllıard dollardy quraýda», - deıdi A.Esimov.
Shahar basshysynyń aıtýynsha, Almatyda elimizdegi joǵary oqý oryndary ǵylym men óndiristiń arasy áli alshaq. Ony Innovation EXPO 2012 ınnovatsııalyq jobalar kórmesinen de anyq baıqaýǵa bolady. Ǵalymdar óz eńbekteriniń óndiriske engizilýine óte múddeli. Ázirge olar tek joba kúıinde ǵana qalyp otyr. Jalpy jańa ıdeıalardy júzege asyrýdyń naqty alańy Almatyda Erkin ekonomıkalyq aımaq retinde jumys jasaıtyn Innovatsııalyq tehnologııalar parki bola alady. Qazir 163 gektar alqapty quraıtyn bul aımaqta arnaıy qolaıly salyqtyq jáne kedendik rejim quryldy. Aldaǵy jyly parktiń ekinshi kezeńiniń ınjenerlik ınfraqurylymynyń qurylysy bastalady.
