«Innovatsııalyq Qazaqstan» konkýrsynyń júldegerleri men jeńimpazdaryn «Samuryq-Qazyna» qory jumysqa alatyn boldy
ASTANA. 27 qyrkúıek. QazAqparat - «Innovatsııalyq Qazaqstan» konkýrsynyń júldegerleri men jeńimpazdary «Samuryq-Qazyna» ál-aýqat qorynyń kompanııalar tobyna jumysqa alynatyn bolady.
Bul týraly atalmysh qordyń baspasóz qyzmeti habarlaıdy.
Jastar arasynda ótetin «Innovatsııalyq Qazaqstan» respýblıkalyq konkýrsynyń on júldegeri men eki jeńimpazy olardyń biliktiligi men tájirıbesine qaraı «Samuryq-Qazyna» ulttyq ál-aýqat qory» aktsıonerlik qoǵamynyń kompanııalar tobyna jumysqa qabyldanatyn bolady. Atalmysh baıqaý Qazaqstan jastary arasynan daryndylarda tabý úshin uıymdastyrylǵan. Al aqtyq básekege shyqqandardyń ınnovatsııalyq ıdeıalary olardyń kásibı deńgeıiniń, is júzinde jumysta óziniń múmkindikterin kórsetýge daıyn ekendiginiń belgisi bolyp esepteledi.
«Samuryq-Qazyna» aktsıonerlik qoǵamynyń Adam resýrstaryn basqarý departamentiniń dırektory Gúlmıra Raıysova: «Qazirgi kezde kez kelgen kompanııaǵa serpindi kúsh, tyń ıdeıalardyń generatorlary men alǵa jyljytýshylary qajet dep oılaımyn. Máselen, eger qatysýshy aqtyq máredegi ondyqtyń qataryna iligip, onyń ınnovatsııalyq ıdeıasy belgili bir salaǵa ınnovatsııa ákeletin bolsa, ony nelikten jumysqa almasqa?»,-degen pikirin bildirdi.
Aqtyq synǵa shyqqan oqýshylar men stýdentterdi qor kadrlyq rezervke qoıý máselesin qarastyrýǵa, sondaı-aq enshiles uıymdardyń birinde jazǵy praktıka men taǵylymdamadan ótý múmkindigin usynýǵa daıyn.
Buǵan deıin habarlanǵandaı, konkýrs qorytyndysy boıynsha daryndy jastar pýly, sondaı-aq «ıdeıalar men jobalar toptamasy» qurylatyn bolady. «Innovatsııalyq Qazaqstan» konkýrsynyń talaptaryn túsindirý respýblıkanyń 150-den astam oqý oryndarynda ótip jatyr. Konkýrs bastalǵan eki aptanyń ishinde oǵan 80-nen astam ótinish kelip tústi. Arnaıy júrgizilgen taldaý jumystarynyń nátıjeleri boıynsha Astana, Ońtústik Qazaqstan oblysy men Almatynyń 15 jáne 18 jas aralyǵyndaǵy jastary erekshe belsendilik tanytyp otyr.
