Innovatsııalyq ekonomıkany qurý qomaqty qarjyny qajet etedi - Ǵylym komıteti
ASTANA. QazAqparat - Qazaqstanda ınnovatsııalyq ekonomıkany qurý úshin eń aldymen qomaqty qarjy bólinýi kerek. OKQ-da «Ónimdi ınnovatsııalardy yntalandyrý jobasynyń iske asyrylýy» taqyrybynda ótken baspasóz máslıhatynda QR BǴM Ǵylym komıtetiniń tóraǵasy Bolatbek Ábdirasylov osylaı málimdedi, dep habarlaıdy «QazAqparat» HAA tilshisi.
«Búgingi tańda elimizde ǵylymǵa mol qarajat bólinip jatqany, biraq eshqandaı nátıjeniń joqtyǵy aıtylyp jatyr. Synı pikir qoǵamnan da, basshylyq turǵysynan da bar. Biraq men Qazaqstanda ǵylymǵa jalpy ishki ónimniń 0,14 paıyzy ǵana bólinetinin atap ótkim keledi. Ózge eldermen salystyrǵanda bul soma tym az. Ortasha eseppen Eýropa elderi ǵylym salasyna JІÓ-niń 1 paıyzyn bóledi. Al tipti ınnovatsııa salasynda iri jetistikterge qol jetkizgen Izraıl 4 paıyzyn, Ońtústik Koreıa 3,5 paıyzyn ǵylymnyń damýyna jumsap otyr. Baǵamdasaq, ǵylym men ınnovatsııa salasynda alǵa shyǵyp ketken memleketter bul salaǵa barynsha kóp qarajat bólýde», - deıdi ol.
Bolatbek Ábdirasylovtyń aıtýynsha, Qytaıdaǵy bir ǵana Alibaba kompanııasy aldaǵy 3 jyldyq jumysy úshin 5 mlrd AQSh dollaryn bólgen. Bul qarajat teńgege eseptep shaqqanda 1,5 trıllıon teńgege teńesedi.
«Al bizde jyl saıyn ǵylym salasyna 35-36 mlrd teńge bólinedi. Qyrkúıek aıynyń basynda ǵana ǵylym jáne tehnologııa boıynsha Islam memleketteri uıymynyń sammıti ótti. Onda qabyldanǵan baǵdarlamalyq qujatqa sáıkes, atalǵan uıymǵa enetin ár memleket JІÓ-niń 0,3 paıyzyn ǵylym men ınnovatsııa salasyna bólýi kerek. Demek, biz bul salaǵa bólinetin qarjyny eseleı túsemiz. Aldaǵy 3,5 jylda biz osy asýdy baǵyndyramyz dep otyrmyz», - deıdi ol.
