«Innovatsııaly Qazaqstan» respýblıkalyq ıdeıalar konkýrsy bastaldy
Bul týraly elordada uıymdastyrylǵan baspasóz máslıhaty barysynda «Samuryq-Qazyna» UÁQ» AQ basqarmasy tóraǵasynyń orynbasary Qýandyq Bıshimbaev málim etti.
«Biz ótken jylǵy tájirıbeni zerdeledik. Óıtkeni osy joly qatysýshylardyń ıdeıalary ulttyq kompanııalardyń tehnologııalyq mindetterin sheshýge shynaıy kómek bergenin qalaımyz», - dedi ol.
Onyń atap ótýinshe, osymen ekinshi jyl qatarynan ótkizilip otyrǵan baıqaýdyń negizi maqsaty qordyń enshiles kompanııalarynyń negizgi tehnologııalyq mindetterin sheshý úshin eń úzdik ıdeıalardy júzege asyrý bolyp tabylady. Sebebi ulttyq kompanııalarda energetıka, telekommýnıkatsııa, kólik jáne mashına jasaý, taý-ken isi, munaı-gaz salalarynda 143 tehnıkalyq mindet anyqtaldy.
«Jobalar ǵylymı-tehnıkalyq, áleýmettik-ekonomıkalyq jáne ekologııalyq turǵydan alyp qaraǵanda tıimdi, júzege asyrylatyn ári rentabeldi bolýy tıis. Sonymen qatar qor kompanııalar tobynyń ózekti problemalaryn sheshýge járdemdesýi qajet», - dedi Q.Bıshimbaev.
Aǵymdaǵy jyly baıqaý jeńimpazdary Qordyń enshiles uıymdary bekitken 6 atalym boıynsha, atap aıtanda «Munaı men gaz», «Energetıka», «Kólik», «Taý-ken isi», «Telekommýnıkatsııa» jáne «Mashına jasaý» salalarynda marapattalady.
Aıta keterligi, baspasóz máslıhaty barysynda Innovatsııalyq ıdeıalar aqparattyq ınkýbatory júıesi tanystyryldy.
