«Innovatsııaly Qazaqstan» baıqaýynda jeńiske jetken eki jańashyl jas bilim alý úshin 5 mıllıon teńgeden grantqa ıe bolady
ASTANA. 16 qarasha. QazAqparat /Marlan Jıembaı/ - «Innovatsııaly Qazaqstan» baıqaýynda jeńiske jetken eki jańashyl jas bilim alý úshin 5 mıllıon teńgeden grantqa ıe bolady. Búgin elordada atalǵan konkýrstyń eksperttik keńesiniń birinshi otyrysy ótti.
«Innovatsııaly Qazaqstan» respýblıkalyq baıqaýy aǵymdaǵy jyldyń qyrkúıek aıynda bastalǵan bolatyn. Qazirgi ýaqytta baıqaýǵa túsken 806 jobanyń 56-sy iriktelinip alyndy. Uıymdastyrýshylardyń atap ótýinshe, stýdentter taraby belsendi qatysýda. Sonymen qatar mektep oqýshylary men jas kásipkerler de óz eńbekterin jiberýde.
«Áleýmettik ıdeıa» jáne «Tehnologııalyq serpin» atalymdary boıynsha ótip jatqan baıqaýǵa túsken jobalardyń ishinde birqatar nazar aýdartatyn eńbekter bar. Máselen, quramynda maıy bar qaldyqtardan bıologııalyq dızel otyny óndirisi, elimizdegi birinshi stýdentter telearnasyn ashý, jedel medıtsınalyq járdem avtokóligi spýtnıgi monıtorınginiń jalpy respýblıkalyq ortalyǵyn qurý syndy jobalar konkýrstyq komıssııa músheleriniń nazaryna ilinip otyr.
Ótinimderdi qabyldaý aǵymdaǵy jyldyń 1 jeltoqsanyna deıin júrgiziledi.
