Innovatsııalardy damytý munaı-gaz ónerkásibi úshin óte mańyzdy - Dıde Ollo
TANA. 5 qazan. QazAqparat -Frantsýzdyń GDF SUEZ E&P kompanııasynyń Birinshi vıtse-prezıdenti Dıde Ollo KAZENERGY VI Eýrazııalyq Forýmynyń aıasynda «Energetıkalyq sektordaǵy ınnovatsııalardyń aýqymy: tıimdiligin arttyrý jáne barlaý men shyǵarýdyń geografııalyq, geologııalyq jáne tehnıkalyq shekterin damytý» taqyrybynda baıandama jasady. Sessııa aıaqtalǵannan keıin Ollo myrza pm.kz saıtyna arnaıy suhbat berdi.
- Qazaqstandaǵy ınnovatsııalyq damýdyń perspektıvasyn qalaı baǵalaısyz?
- GDF SUEZ E&P kompanııasy Qazaqstanda júzege asyryp jatqan joba - Hvalynskoe kenishi - Kaspıı teńizinde Qazaqstan men Reseıdiń shekarasynda ornalasqan. Onda gaz kondensatyn óndirý qıyn bolǵandyqtan, shyǵystardy azaıtý úshin kompanııa ınnovatsııalyq tehnologııalardy qoldanýda. Qazaqstandyq operatorlarmen, sondaı-aq «Lýkoıl» jáne «Total»-men birlesip, ınnovatsııalyq sheshimderdi ári qaraı jetildire beremiz degen senimdemin.
- Munaı-gaz sektoryndaǵy ınnovatsııalyq yntymaqtastyq qanshalyqty tıimdi?
- Energetıkalyq kompanııalarǵa mol ınvestıtsııalar kerek bolǵandyqtan, olar ózderine tıimdirek jumys isteýge, kenishterdi ıgerý jumystaryn arzandatýǵa múmkindik beretin ınnovatsııalardy damytýǵa ázir. Sondyqtan da, munaı-gaz sektory úshin, ásirese, azııalyq aımaq úshin, kompanııalardyń ınnovatsııalardy engizýge degen ázirligi negizgi faktor dep sanaımyn. Ondaı ınnovatsııalardy ádette birneshe kompanııa seriktese otyryp ázirleıdi. Sondyqtan da, siz operatoryńyzǵa jaqsy ıdeıa usynsańyz, onyń seriktesteri ol týraly estip-bilse, olar sol tehnologııalardy basqa salalarda qoldana bastaıdy. Osyǵan baılanysty, ınnovatsııalardy damytý munaı-gaz ónerkásibi úshin óte mańyzdy.
