Innovatsııa salasyn damytýda burynǵy men búgingi kúndi ushtastyra bilý mańyzdy - Úkimet basshysy K.Másimov
ASTANA. 6 jeltoqsan. QazAqparat /Aıdar Ospanalıev/ - Innovatsııany damytýdyń jańa naryqtyq ustanymdary men memlekettiń ınnovatsııany damytýdaǵy osyǵan deıin qol jetkizgen jetistikterin úılestire bilý - bizdiń bolashaqta sheshýimiz qajet mańyzdy máselelerdiń biri.
Bul týraly búgin Prezıdenttik ınnovatsııalyq klýbtyń alǵashqy otyrysynda Premer-Mınıstr Kárim Másimov málim etti.
Úkimet basshysynyń sózine qaraǵanda, Keńes Odaǵynyń tusynda ınnovatsııany damytý áskerı ónerkásip keshenimen tikeleı baılanysty bolatyn. Óıtkeni ol júıeniń áskerı ónerkásip kesheni belgili bir deńgeıde básekege qabiletti edi. Osyǵan qaraı qazaq jerinde de álem boıynsha básekege qabiletti birqatar ınnovatsııalyq salalar paıda boldy. «Osy sebepti bizdiń búgingi maqsatymyz ınnovatsııa salasyndaǵy buryn bolǵan jáne qazirgi qolda bar múmkindikterdi ushtastyra bilý»,-dep atap kórsetti Premer-Mınıstr.
