«INNOVA INVESTMENT» JShS kredıt qabilettiligi boıynsha «V+» reıtıngine kóterildi
ASTANA. 6 qańtar. QazAqparat /Qanat Mámetqazyuly/ - «Ekspert Qazaqstan» reıtıngtik agenttigi «INNOVA INVESTMENT» jaýapkershiligi shekteýli seriktestigine kredıt qabilettiligi boıynsha «V+»
(kredıt qabilettiligi úshin jetkilikti deńgeı) deńgeıindegi reıtıngti jáne oblıgatsııalar shyǵarý josparlarynyń senimdiligi reıtıngine «V» (senimdiliktiń qanaǵattanarlyq deńgeıi) deńgeıin taǵaıyndady.
«Ekspert Qazaqstan» agenttigi baspasóz qyzmetiniń aqparatyna qaraǵanda, atalmysh kompanııanyń reıtıngine taza aınalym kapıtalynyń ósimi ( 2008 jyldan 2011 jyldyń 2 toqsanyna deıingi ósim 879%), tólempazdyqtyń joǵary kórsetkishteri (2011 jyldyń 1-i jarty jyldyǵynyń sońyna taman absolıýtti tólempazdyq koeffıtsıenti 1,49, aǵymdaǵy tólempazdyq koeffıtsıenti - 3,22, jedel tólempazdyq koeffıtsıenti - 3,22) jáne kredıtorlyq boryshtardyń tómendeýi (2008 jyldan 2011 jyldyń 2-toqsanyna qaraı kredıtorlyq borysh 53,18 paıyzǵa tómendegen) oń yqpal etken.
«Agenttiktiń pikirinshe, kompanııa ıeleri qarjylyq jaǵdaıy nasharlaı qalǵan jaǵdaıda oǵan qarjylyq qoldaý kórsetýge ázir ekenin tanytty. Bul kompanııanyń reıtıngin jaǵymdy ete túsedi», - deıdi «Ekspert Qazaqstan» agenttiginiń qarjylyq emes sektor jónindegi sarapshysy Anna Akopıants.
«INNOVA INVESTMENT» reıtıngin shekteıtin negizgi faktorlar qaryzdyq júktemelerdiń joǵarylyǵy bolyp tabylady (2010 jyldyń tabystaryna 2011 jylǵy 2-toqsandaǵy boryshtar úlesiniń qatynasy 2,32-ti quraıdy). Budan bólek, bıznes aýqymynyń emıssııalyq parametrleriniń sáıkespeýi (2010 jylǵy tabysqa emıssııa qatynasy 14,2-ti quraıdy), ózindik kapıtaldyń tómendeýi (2008 jyldan 2011 jyldyń 2-toqsanyna qaraı ózindik kapıtal 13,9 paıyzǵa tómendegen), sondaı-aq aktıvterdiń tómendeýi de (2008jyldan 2011 jyldyń 2-toqsanyna aktıvter 12 paıyzǵa tómendegen) reıtıngtik shekteýge soqtyryp otyr.
Sonymen qatar, tejeıtin faktorlar arasynda iskerlik belsendiliktiń tómengi kórsetkishin (2010 jyldyń qorytyndysy boıynsha debıtorlyq qaryzdyń aınalymdylyǵy - 492 kún, kredıtorlyq qaryz - 494 kúndi quraǵan), rentabeldilik kórsetkishteriniń joǵary emestigin (ROA - 0,52%, ROE - 0,55%) jáne zaem qarajattaryn ártaraptandyrýdyń tómen deńgeıin aıtýǵa bolady.
«INNOVA INVESTMENT» JShS-nyń negizgi qyzmet baǵyty jyljymaıtyn múlikter boıynsha operatsııalar, jyljymaıtyn múlikke jáne qundy qaǵazdarǵa ınvestıtsııalar, rıelterlik jáne konsýltatsııalyq qyzmetter jatady. Kompanııanyń 2010 jylǵy taza tabysy 148 mln. teńge, aktıvteri 28,6 mlrd. teńge, al ózindik kapıtaly 26,5 mlrd. teńgeni quraǵan.
