Inklıýzııa: Pavlodardaǵy túzetý kabınetterine 150 bala kezekte tur
PAVLODAR. KAZINFORM — Ertis-Baıan óńirindegi ınklıýzıvti bilim berý salasy júıeli kóringenimen, ishki ıirimderinde sheshimin tappaǵan túıtkilderdiń az emes ekeni ańǵarylady. Maman tapshylyǵy men tómen jalaqy salanyń «tusaýyna» aınalǵandaı.
Oblysta erekshe bilim berýdi qajet etetin 8,5 myńnan astam bala bar. Bul jaı ǵana statıstıka emes, bul — 8,5 myń taǵdyr, 8,5 myń otbasynyń úmiti. Onyń ishinde 1800-den asa bala mektepke deıingi uıymdarda, 900-den astam bala arnaıy mektep-ınternattarda, 3700-den astam bala jalpy bilim berý mektepterinde, 150-den astamy tehnıkalyq jáne kásiptik bilim berý uıymdarynda qamtylǵan. Sonymen qatar, aýtızm ortalyǵynda 40-tan asa jasóspirim, psıhologııalyq-pedagogıkalyq túzetý kabınetinde 300-deı jetkinshek qoldaý qyzmetterimen qamtylǵan.
Óńirdegi 35 arnaıy bilim berý uıymy men mektepter janynan ashylǵan 21 ınklıýzııany qoldaý kabıneti quptarlyq dúnıe. Deıturǵanmen bul uıymdar men kabınetterdiń negizgi bóligi Pavlodar, Ekibastuz, Aqsý sııaqty iri qalalarda ǵana shoǵyrlanǵan. Aýyldyq jerlerdegi erekshe balalardyń jaıy qalaı bolmaqshy? Aýyldaǵy ata-ana balasyn qalaǵa tasymaldaýǵa qaýqarsyz bolsa, jetkinshektiń qoǵamnan oqshaýlanyp qalý qaýpi joǵary.
Eń úlken kedergilerdiń biri — kezek máselesi
Óńirlik bilim berý basqarmasy basshysynyń orynbasary Alma Aıtýarovanyń dereginshe, psıhologııalyq-pedagogıkalyq túzetý kabınetterine áli kúnge 150-ge jýyq bala kezekte tur. Onyń ústine logoped, defektolog, olıgofrenopedagogter men pedagog-assıstentterdiń jetispeýshiligi qalyptasqan.
— Keıbir túzetý qyzmetterine suranystyń joǵary bolýyna baılanysty kezek qalyptasýy múmkin. Kezektiń qalyptasýy kóbine psıhologııalyq-pedagogıkalyq qoldaý jáne ońaltý kýrstarynyń uzaqtyǵyna baılanysty bolyp otyr. Ádette mundaı kýrstardyń uzaqtyǵy 90 kúnnen 365 kúnge deıin sozylatyndyqtan, jańadan balalardy qabyldaý belgili bir ýaqytty talap etedi. Al jalpy oblysta 4 psıhologııalyq-medıtsınalyq-pedagogıkalyq konsýltatsııa jumys isteıdi. Ata-analar solarǵa júginip, balanyń damý erekshelikterine qatysty keshendi baǵalaý men usynymdar ala alady. Komıssııa balanyń qandaı bilim berý jaǵdaıynda oqýy qajet ekendigin anyqtap, tıisti qorytyndy beredi, — deıdi basqarma ókili.
Máseleniń tórkini kadrlardyń jetispeýshiliginde emes, olardy ustap turatyn yntalandyrý júıesiniń azdyǵynda jatqan sııaqty. Pedagog-assıstenttiń jalaqysy 120 myń teńgeden bastalatynyn eskersek, bul saladaǵy kadr jetispeýshiligine tańǵalýdyń qajeti joq. Erekshe balamen kúni boıy jumys isteý, onyń árbir minezi men qajettiligine beıimdelý — orasan zor psıhologııalyq júkteme.
Onyń ústine materıaldyq-tehnıkalyq bazanyń eskirgeni de jasyryn emes. Qazirgi zamanǵy tehnologııalar, sensorlyq bólmeler men arnaıy qural-jabdyqtar tek sanaýly ǵana ortalyqtarda bar. Inklıýzııalyq bilim — bul balany mektepke ákelip, ony synyptyń bir buryshyna otyrǵyzyp qoıý emes. Ol — balanyń ózin jaıly sezinýi, sabaqqa tolyqqandy qatysýy jáne ózgelermen teń qarym-qatynas jasaýy. Bul úshin tek qana maman emes, soǵan laıyqtalǵan orta kerek.
Buǵan deıin elimizde ınklıýzıvti bilim berý júıesin damytýda qandaı kedergiler bar ekenin jazǵanbyz.