Inklıýzıvti bilim: Kókshetaýda І Aımaqaralyq ǵylymı konferentsııa ótti
KÓKShETAÝ. QazAqparat – Kókshetaýda erekshe qajettiligi bar jetkinshekterdiń bilim alýyna arnalǵan 1-inshi Aımaqaralyq ǵylymı-tájirıbelik konferentsııa ótti, dep habarlaıdy QazAqparat tilshisi.
Aqmola oblystyq Bilim basqarmasynyń baspasóz qyzmetinen málim etkendeı, konferentsııaǵa arnaıy bilim berý uıymdarynyń pedagog qyzmetkerleri (arnaıy mektep-ınternattar, PMPK, PPTK), ınklıýzıvti tájirıbelerdi engizý boıynsha jalpy bilim beretin tirek mektepter, tehnıkalyq jáne kásibı bilim berý uıymdary men joǵary oqý oryndary, «Órleý» BAUO» AQ fılıaly Aqmola oblysy boıynsha pedagogıkalyq qyzmetkerlerdiń biliktiligin arttyrý ınstıtýty, oblystyq, aýdandyq jáne qalalyq bilim basqarmalary men bólimderiniń, sondaı-aq Aqmola, Qaraǵandy, Qostanaı, Pavlodar, Soltústik Qazaqstan oblystary men Nur-Sultan qalasynyń ádistemelik kabınetteriniń basshylary men qyzmetkerleri qatysty.
Jıynda sóz sóılegen Aqmola oblystyq Bilim basqarmasy basshysynyń orynbasary Botakóz Dúısenova sharany uıymdastyrý maqsatyna toqtaldy.
«Konferentsııanyń maqsaty - erekshe bilim berý qajettilikteri bar jetkinshekterdi kásiptik baǵdarlaý máselelerinde arnaıy bilim berý uıymdary men TjKB uıymdarynyń birlesken qyzmetin talqylaý boıynsha dıalogtyq alań qurý», - dep atap ótti Botakóz Dúısenova.
Budan bólek, konferentsııanyń plenarlyq bóliminde QR Bilim jáne ǵylym mınıtsrligi TjKB departamentiniń bas sarapshysy M.Jumabekova, «Kásipqor» holdıngi TjKB mazmunyn jańartý departamentiniń bas menedjeri, Y.Altynsarın atyndaǵy Ulttyq bilim akademııasy ınklıýzıvti bilim berýdi damytý ortalyǵynyń dırektory S.Ysmaǵulova, Aqmola oblysy boıynsha «Órleý» fılıalynyń dırektory N.Stýkalenko, áleýmettik jáne jas erekshelik pedagogıkasy jáne ózin-ózi taný kafedrasynyń meńgerýshisi, fılologııa ǵylymdarynyń kandıdaty A.Shaıahmetova, ǵylymı jumys jáne halyqaralyq yntymaqtastyq jónindegi prorektordyń orynbasary, professor D.Lepeshev, Nur-Sultan qalasyndaǵy «Sinergi» ǵylymı-bilim berý qorynyń basshysy A.Nysanov, «BLEK» JShS atqarýshy dırektory R.Nıkıtenko, Kókshetaý qalasynyń qurylys-tehnıkalyq kolledjiniń túlegi «BLEK» JShS-niń aǵash kesýshisi A.Fılonov óz oılaryn ortaǵa saldy.
Plenarlyq bólimnen keıin qatysýshylar topqa bólinip, ınklıýzıvti tájirıbelerdi engizý boıynsha jumys isteıtin Kókshetaý qalalyq №1 jáne №4 oblystyq arnaıy mektepte, Kókshetaý qalalyq №1 qurylys-tehnıkalyq kolledjinde, Krasnoıar kentindegi №3 agrotehnıkalyq kolledjinde sektsııalarǵa qatysty.
