Inklıýzıvti qoǵamǵa bir qadam: qant dıabeti bar Barbı shyqty

ASTANA. KAZINFORM — 9 shilde kúni Mattel kompanııasy Barbie Fashionistas ınklıýzıvti toptamasynan jańa qýyrshaqty — 1-tıptegi qant dıabeti bar Barbıdi tanystyrdy.

Jańa qýyrshaqtyń basty ereksheligi — qant dıabetimen ómir súretin adamdar qoldanatyn medıtsınalyq qurylǵylardyń bolýy: ınsýlın pompasy, qant deńgeıin úzdiksiz baqylaý júıesi (CGM) jáne Barbıdiń fırmalyq belgisi — qyzǵylt júrekshe túrindegi arnaıy medıtsınalyq bekitkish. Qýyrshaqtyń qolynda qandaǵy qant deńgeıin baqylaýǵa arnalǵan qosymshasy bar smartfon bar.

Kompanııa ókilderiniń aıtýynsha, núkteli kóılek kıgen Barbı qant dıabetinen habar beredi. Bul — aýrýdyń halyqaralyq belgisi bolyp tabylatyn sheńber men onyń sımvolyna aınalǵan kók tústiń úılesimi.

— 1-tıptegi qant dıabeti bar alǵashqy Barbı qýyrshaǵymen tanysyńyzdar! Biz bul qýyrshaqty osy qaýymdastyqqa arnap jasaý úshin Breakthrough T1D (burynǵy JDRF) uıymymen seriktestik ornattyq, — delingen ónimniń resmı sıpattamasynda.

Jańa Barbı — 2019 jyldan beri damyp kele jatqan Barbie Fashionistas toptamasynyń jalǵasy. Bul toptamada sonymen qatar Daýna sındromy bar qýyrshaqtar, múgedekter arbasyndaǵy qýyrshaqtar, aq taıaqshamen júrgen zaǵıp qýyrshaqtar, sondaı-aq túrli teri reńkteri, dene pishinderi jáne shash tekstýrasy bar qýyrshaqtar bar.

Fashionistas toptamasy balalarǵa ártúrli jarqyn obrazdardy usynýǵa jáne ózin-ózi kórsetýge, ózin qabyldaýǵa, ózgelerge qurmetpen qaraýǵa shabyt berýge baǵyttalǵan. Qýyrshaqtar 3 jastan bastap balalarǵa arnalǵan jáne shekteýli tırajben shyǵarylady. Ár qýyrshaq jeke satylady.

Eske sala keteıik, keıingi kúnderi Qytaıdyń tanymal oıynshyq brendi Labubu-ǵa baılanysty jańalyqtar áleýmettik jelilerde ǵana emes, qarjy naryǵynda da qyzý talqyǵa tústi. Qoǵamda úlken qyzyǵýshylyq týdyrǵan bul brendtiń aınalasyndaǵy jaǵdaı kúrt ózgerip, oǵan qatysty aktsııalar baǵasy kúrt quldyrady.