Inklıýzıvti qoǵam qalyptastyrý úshin áli biraz jumys isteý qajet – Baıan Jalmaǵanbetova

ASTANA. KAZINFORM – Elimizde qalyptasqan qaǵıdatqa sáıkes, ınklıýzııa dep múgedektigi bar azamattardy aıtady. Biraq, bul túsinik qate. Mundaı pikirdi BIZDIÑ ORTA podkastynda Májilis depýtaty Tańsáýle Serikov bildirdi.

– Inklıýzııa degenimiz ne? Inklıýzııa adamnyń qaǵıdat jaǵynan shektelýi: densaýlyǵyna, dinı kózqarasyna, ekonomıkalyq belsendiligine jáne basqa da aǵymdarǵa baılanysty shektelýi. Al Qazaqstanda qalyptasqan qaǵıdat boıynsha ınklıýzııa dep múgedektigi bar azamattardy aıtady. Olaı emes. Zeınetker adam, aıaǵy aýyr áıel, LGBT-daǵylar, teris dinı aǵymdaǵy azamattar ınklıýzııaǵa jatady. Sol sebepti ınklıýzııa degende baıqap qaraýymyz qajet. Bul termınologııa adam balasy paıda bolǵannan bar dúnıe. Olardy qoǵamda teń quqyly azamat retinde qabyldaý basqa dúnıe. Sol sebepten olarǵa jańasha termınologııamen, jańasha kózqaraspen qaraýymyz, - dedi Májilis depýtaty.

Al Adam quqyqtary ýákiliniń Astana qalasy boıynsha ókili Baıan Jalmaǵanbetovanyń aıtýynsha, elimizde ınklıýzııa mádenıeti birtindep damyp kele jatyr. Keıingi jyldary memleket tarapynan, azamattyq qoǵam tarapynan kóptegen bastama da qolǵa aldy. 

– Máselen, bilim berý júıesinde ınklıýzıvti mektepter, synyptar ashylyp, áleýmettik qyzmetter sapasy artyp keledi. Qoǵamda múmkindigi shekteýli adamdarǵa kózqaras sál de bolsa ózgerip, olardyń qoǵamnyń belsendi múshesi retin qabyldanýyna jaǵdaı jasalyp jatyr. Degenmen, tolyqqandy ınklıýzıvti qoǵam qalyptastyrý úshin áli biraz jumys isteý qajet. Aıtalyq, ınfraqurylymdaǵy kedergiler, aqparatqa qol jetkizýde shekteýler bar. Sonymen qatar eńbek naryǵynda da teń múmkindikter jetispeıdi. Іlgerileý bar, joq emes. Biraq, ınklıýzııany ómir salty retinde qalyptastyrý úshin júıeli ári keshendi is-sharalar kerek, - dedi ol.