Inklıýzıvti qoǵam: bas qalada jyl aıaǵyna deıin nysandardyń 80%-y beıimdeledi
ASTANA. KAZINFORM — Astanada múgedektigi bar azamattar úshin qoljetimdi orta qalyptastyrý jumystary kúsheıtildi. Jyl basynan beri júrgizilgen baqylaý barysynda pandýs, taktıldi belgiler men arnaıy beıimdeý talaptarynyń oryndalmaýyna baılanysty aıyppuldar salynyp, nysandardyń qoljetimdiligin arttyrýǵa baǵyttalǵan sharalar qolǵa alyndy. Bul týraly Astana qalasynyń ákimdigi málimdedi.
Astana qalasy boıynsha Halyqty áleýmettik qorǵaý salasyndaǵy retteý jáne baqylaý komıteti departamentiniń basshysy Asqar Aımaǵambetov aıtýynsha, azamattardyń áleýmettik jáne kólik ınfraqurylymy nysandaryna kedergisiz qol jetkizýin qamtamasyz etýge, sondaı-aq kórsetiletin qyzmetterdiń sapasyna erekshe nazar aýdarylady.
— 2026 jyldyń tórt aıynyń qorytyndysy boıynsha departament Qazaqstan Respýblıkasynyń Áleýmettik kodeksi talaptarynyń saqtalýyna qatysty 17 tekserý júrgizdi. Onyń ishinde 1 profılaktıkalyq tekserý, 8 jospardan tys tekserý jáne prokýratýra organdarymen birlesip ótkizilgen 8 tekserý ótken, — deıdi Asqar Aımaǵambetov.
Qabyldanǵan sharalar múgedektigi bar adamdardyń quqyqtaryn qorǵaýdy qamtamasyz etýge jáne áleýmettik ınfraqurylym nysandary ıeleriniń jaýapkershiligin arttyrýǵa baǵyttalǵan.
Kedergisiz orta qalyptastyrý jumystary «AMANAT» partııasynyń saılaýaldy baǵdarlamasyn iske asyrý jónindegi Jol kartasy aıasynda júrgizilýde.
Bekitilgen josparǵa sáıkes, 2026 jyldyń sońyna deıin «INVA.gov.kz» portalynyń qoljetimdiliktiń ınteraktıvti kartasyna engizilgen áleýmettik mańyzy bar nysandardyń beıimdelý deńgeıi jalpy nysandar sanynyń 80%-yn quraýy tıis.
— Qazirgi tańda júıege Astana qalasynyń áleýmettik ınfraqurylymynyń 2143 nysany engizilgen. Onyń ishinde 1435 nysan beıimdelgen, bul 67%-dy quraıdy. Jyl sońyna deıin 1714 nysandy beıimdeý qajet, — delingen habarlamada.
2026 jylǵy 1 shildeden bastap Qazaqstan Respýblıkasynyń Qurylys kodeksiniń 135-babynyń normasy kúshine enedi. Jańa normalarǵa sáıkes, áleýmettik jáne kólik ınfraqurylymynyń halyqtyń júrip-turýy shekteýli toptary, onyń ishinde múgedektigi bar adamdar úshin qoljetimdilik talaptaryna sáıkestigin rastaý fýnktsııasy jergilikti atqarýshy organdarynan Qazaqstan Respýblıkasy Eńbek jáne halyqty áleýmettik qorǵaý mınıstrligine beriledi.
Atalǵan fýnktsııany iske asyrý Astana qalasy boıynsha Halyqty áleýmettik qorǵaý salasyndaǵy retteý jáne baqylaý komıteti departamenti júkteledi.
Qalalyq ortanyń qoljetimdiligin qamtamasyz etý máselesi azamattardyń konstıtýtsııalyq quqyqtaryn saqtaýmen jáne ınklıýzıvti qoǵam qalyptastyrýmen tikeleı baılanysty.
Múgedektigi bar adamdardyń kedergisiz qozǵalýyna jáne qyzmetterdi alýyna jaǵdaı jasaý tek zańnama talaby ǵana emes, sonymen qatar qoǵamnyń áleýmettik jaýapkershiligi men qalalyq ınfraqurylym sapasynyń mańyzdy kórsetkishi.
Eske sala keteıik, buǵan deıin Astanada múgedektigi bar balalarǵa arnalǵan aralas áleýmettik qyzmet modeli engizilgenin jazdyq.
