Inklıýzıvti bilim berýde psıhologııalyq-pedagogıkalyq qoldaýdyń úsh deńgeıli modeli engizilip jatyr
ASTANA. KAZINFORM – Oqý-aǵartý mınıstrligi ınklıýzıvti bilim berý jaǵdaıynda psıhologııalyq-pedagogıkalyq qoldaýdyń úsh deńgeıli modelin engizip jatyr.
Oqý-aǵartý mınıstrligi barlyq balaǵa arnalǵan, onyń ishinde erekshe bilim berýdi qajet etetin balalar úshin oqytýǵa teń qoljetimdilik múmkindikterin keńeıtý boıynsha birqatar shara qabyldady.
Mınıstrliktiń baspasóz qyzmeti habarlaǵandaı, jańa erejelerge sáıkes bilim berý uıymdarynda psıhologııalyq-pedagogıkalyq qoldaýdyń úsh deńgeıli modeli iske asyrylatyn bolady.
Birinshi deńgeıde synyp jetekshileri men muǵalimder balaǵa synypta nemese topta sabaq kezinde qoldaý kórsetedi. Ekinshi deńgeı psıhologııalyq-pedagogıkalyq súıemeldeý qyzmetiniń mamandaryn, onyń ishinde pedagog-psıhologtardy, áleýmettik pedagogterdi, arnaıy pedagogter men pedagog-assıstentterdi tartýdy kózdeıdi. Qajet bolǵan jaǵdaıda úshinshi deńgeıde sýrdopedagogter, tıflopedagogter jáne basqa da sarapshylar, beıindi mamandar qosylatyn bolady.
«Bul sharalar oqýda qıyndyqtary bar barlyq balalar úshin bilim berý qyzmetiniń sapasyn jaqsartýǵa baǵyttalǵan. Psıhologııalyq-pedagogıkalyq qoldaýdyń úsh deńgeıli modeliniń arqasynda balalar ózderiniń qajettilikteri men jeke múmkindikterine barynsha sáıkestendirilgen qoldaý alady», - dep atap ótti QR Oqý-aǵartý mınıstrliginiń ınklıýzıvti jáne arnaıy bilim berý departamentiniń dırektory Laýra Býtabaeva.
Atalǵan sharalar árbir bala úshin óz áleýetin iske asyrýǵa múmkindik beretin ınklıýzıvti bilim berý ortasyn qalyptastyrady.
Aıta keteıik, QR Oqý-aǵartý mınıstrligi ınklıýzıvti bilim berýdi damytýǵa basymdyq berip jatyr. Búgingi tańda jalpy bilim berý mektepteriniń 86%-dan astamynda qazirdiń ózinde ınklıýzıvti bilim berý boıynsha jaǵdaı jasaldy.
